റീൽസ് കൊണ്ട് പൊറുതിമുട്ടി, മകളുടെ കല്യാണത്തിന് പോലും വന്നത് തലേന്ന്: പ്രശസ്ത റീൽസ് താരം ചിത്രയെ കൊലപ്പെടുത്തി ഭർത്താവ്

തിരുപ്പൂർ: റീൽസ് ഭ്രാന്ത് മൂത്ത് കുടുംബം പോലും നോക്കുന്നില്ലെന്ന കാരണത്താൽ യുവതിയെ ഭർത്താവ് കൊലപ്പെടുത്തി. തമിഴ്‌നാട്ടിലെ തിരുപ്പൂർ ജില്ലയിലാണ് സംഭവം. ഡിണ്ടു​ഗൽ സ്വദേശിയായ അമിർതലിംഗമാണ് തന്റെ ഭാര്യ ചിത്രയെ ഷാൾ കൊണ്ട് ശ്വാസം മുട്ടിച്ച് കൊലപ്പെടുത്തിയത്. ഇയാളെ പൊലീസ് അറസ്റ്റ് ചെയ്തു. അമിർതലിംഗവും ഭാര്യയും തിരുപ്പൂരിലെ സെല്ലം നഗറിലാണ് താമസിച്ചിരുന്നത്. തെന്നം പാളയം പച്ചക്കറി മാർക്കറ്റിൽ ദിവസ വേതന തൊഴിലാളിയായി ജോലി ചെയ്തു വരികയായിരുന്നു അമിർതലിംഗം.

ഒരു ഗാർമെന്റ് ഫാക്ടറിയിൽ ജോലി ചെയ്തിരുന്ന ചിത്ര, ടിക് ടോക്കിലും ഇൻസ്റ്റാഗ്രാമിലും നിരന്തരം റീലുകൾ പോസ്റ്റ് ചെയ്തിരുന്നു. ഇങ്ങനെ ഇവർ പ്രശസ്തയാകുകയും ചെയ്തു. ഇതോടെ ഇവർ മില്ലിലെ ജോലി ഉപേക്ഷിച്ച് ചെന്നൈയിലേക്ക്ക് പോയി. സിനിമയിൽ അഭിനയിക്കാനെന്ന് പറഞ്ഞാണ് ഭർത്താവിന്റെ എതിർപ്പ് വകവെക്കാതെ ഇവർ പോയത്.
ചിത്രയുടെ ഇൻസ്റ്റാഗ്രാം അക്കൗണ്ടിൽ 33.3K ഫോളോവേഴ്‌സ് ഉണ്ടായിരുന്നു. രണ്ടുമാസം മുമ്പ് ചെന്നൈയിലേക്ക് പോയ ചിത്ര, കഴിഞ്ഞയാഴ്ച മകളുടെ വിവാഹത്തിൽ പങ്കെടുക്കാൻ മടങ്ങിയെത്തി.

ചടങ്ങിന് ശേഷം ചെന്നൈയിലേക്ക് പോകാൻ ഒരുങ്ങുകയായിരുന്ന യുവതിയെ അമൃതലിംഗം തടയുകയിരുന്നു. റീലുകൾ അപ്‌ലോഡ് ചെയ്യുന്നതും സിനിമയിൽ അഭിനയിക്കാൻ ആഗ്രഹിക്കുന്നതുമായ ചിത്രയുടെ ശീലത്തെ ചൊല്ലി ഞായറാഴ്ച രാത്രി തർക്കമുണ്ടായി. തുടർന്ന് അമൃതലിംഗം ചിത്രയെ ഷാൾ ഉപയോഗിച്ച് ശ്വാസം മുട്ടിച്ചു. അവർ ബോധംകെട്ടുവീണപ്പോൾ അമൃതലിംഗം പരിഭ്രാന്തനായി വീട്ടിൽനിന്നു ഇറങ്ങിപ്പോയി. ചിത്രയെ മർദിച്ച വിവരം മകളെ അറിയിച്ചു. മകൾ എത്തി പരിശോധിച്ചപ്പോൾ ചിത്രയെ മരിച്ച നിലയിൽ കണ്ടെത്തി. പിന്നീട് പൊലീസിനെ വിവരമറിയിക്കുകയായിരുന്നു.