എന്തുകൊണ്ടാണ് ബി.ജെ.പി ഏകീകൃത സിവിൽ കോഡ് കൊണ്ടുവരാത്തത്?: അരവിന്ദ് കെജ്‍രിവാൾ

ന്യൂഡൽഹി: സംസ്ഥാനത്ത് ഏകീകൃത സിവിൽ കോഡ് (യുസിസി) നടപ്പാക്കാൻ മന്ത്രിസഭാ യോഗം തീരുമാനിച്ചതായി ഗുജറാത്ത് ആഭ്യന്തര മന്ത്രി ഹർഷ് സംഘവി ശനിയാഴ്ച പ്രഖ്യാപിച്ചതിന് പിന്നാലെ ബി.ജെ.പി പ്രതിപക്ഷ പാർട്ടികളുടെ വിമർശനത്തിനിരയായി. എഐഎംഐഎം അധ്യക്ഷൻ അസദുദ്ദീൻ ഒവൈസിക്ക് പിന്നാലെ ഡൽഹി മുഖ്യമന്ത്രി അരവിന്ദ് കെജ്‍രിവാളും ഗുജറാത്തിൽ യു.സി.സി നടപ്പാക്കിയതിനെതിരെ ബി.ജെ.പിക്കെതിരെ ആഞ്ഞടിച്ചു. എന്തുകൊണ്ടാണ് ബി.ജെ.പി രാജ്യത്തുടനീളം യു.സി.സി കൊണ്ടുവരാത്തതെന്ന് അദ്ദേഹം ചോദിച്ചു.

ഏക സിവില്‍ കോഡ് നടപ്പാക്കുമെന്ന് പറഞ്ഞ് ബി.ജെ.പി വീമ്പിളക്കുകയാണെന്ന് കെജ്‌രിവാള്‍ പരിഹസിച്ചു. ഗുജറാത്ത് നിയമസഭാ തിരഞ്ഞെടുപ്പ് പ്രചാരണത്തിനിടെ സംസാരിക്കുകയായിരുന്നു അദ്ദേഹം. ബി.ജെ.പിയുടെ ഉദ്ദേശം മോശമാണെന്നും, ഭരണഘടനയുടെ 44-ാം അനുച്ഛേദം യു.സി.സി നടപ്പാക്കേണ്ടത് സർക്കാരിന്റെ ഉത്തരവാദിത്തമാണെന്ന് വ്യക്തമായി പറയുന്നുണ്ടെന്നും അതിനാൽ സർക്കാർ ഏകീകൃത സിവിൽ കോഡ് ഉണ്ടാക്കണമെന്നും അദ്ദേഹം പറഞ്ഞു.

എല്ലാ സമുദായങ്ങളുടെയും സമ്മതത്തോടെ എല്ലാവരെയും വിശ്വാസത്തിലെടുത്തുകൊണ്ടും യുസിസി കൊണ്ടുവരണമെന്നാണ് ഡൽഹി മുഖ്യമന്ത്രി ഭാവ്നഗറിൽ വാർത്താസമ്മേളനത്തിൽ പറഞ്ഞത്. ഉത്തരാഖണ്ഡ് നിയമസഭാ തിരഞ്ഞെടുപ്പിന് മുമ്പും ബിജെപി ഇതേ വാഗ്ദ്ധാനം നല്‍കിയിരുന്നുവെന്നും അത് നടപ്പാക്കിയില്ലെന്നും കെജ്‌രിവാള്‍ ചൂണ്ടിക്കാട്ടി.

ഇന്ത്യൻ ഭരണഘടനയുടെ ആർട്ടിക്കിൾ 44-ന് കീഴിൽ വരുന്ന യൂണിഫോം സിവിൽ കോഡ്, എല്ലാ പൗരന്മാർക്കും അവരുടെ മതം, ലിംഗഭേദം, ജാതി മുതലായവ പരിഗണിക്കാതെ തുല്യമായി ബാധകമാകുന്ന വ്യക്തിഗത നിയമങ്ങൾ അവതരിപ്പിക്കാൻ നിർദ്ദേശിക്കുന്നു. UCC പ്രധാനമായും ഒരു പൊതു നിയമത്തെയാണ് സൂചിപ്പിക്കുന്നത്.