ന്യൂഡൽഹി: ഐ.എസ് കേസിൽ എൻ.ഐ.എ അറസ്റ്റ് ചെയ്ത മുഖ്യപ്രതി ജയിലിൽ വെച്ച് മരിച്ചു. ദേശീയ അന്വേഷണ ഏജൻസി അന്വേഷിച്ച ഐ.എസ് കേരള മൊഡ്യൂൾ കേസിലെ മുഖ്യപ്രതിയായ 27 കാരനായ മുഹമ്മദ് അമീൻ ആണ് മരിച്ചത്. മലപ്പുറം മങ്കട സ്വദേശി മുഹമ്മദ് അമീനാണ് ദില്ലി മണ്ഡോലി ജയിലിൽ മരിച്ചത്. ജയിലില്‍ തളർന്നു വീണ അമീനെ ആശുപത്രിയിൽ എത്തിച്ചെങ്കിലും മരണപ്പെടുകയായിരുന്നു. ഡൽഹിയിലെ മണ്ഡോലി ജയിൽ സമുച്ചയത്തിൽ വെച്ച് അമീൻ മരണപ്പെട്ടതായി ശനിയാഴ്ച പോലീസ് കുടുംബാംഗങ്ങളെ അറിയിച്ചു.
ബംഗളൂരുവിൽ വിദ്യാർത്ഥിയായിരുന്ന അമീനെ 2021 മാർച്ചിൽ ആണ് ഐ.എസ് കേസിൽ എൻ.ഐ.എ അറസ്റ്റ് ചെയ്യുന്നത്. വ്യത്യസ്‌ത സോഷ്യൽ മീഡിയ പ്ലാറ്റ്‌ഫോമുകളിൽ വിവിധ ഐ.എസ് പ്രചരണ ചാനലുകൾ നടത്തുകയും ഐ.എസ് മൊഡ്യൂളിലേക്ക് പുതിയ അംഗങ്ങളെ സമൂലമാക്കുകയും റിക്രൂട്ട് ചെയ്യുകയും ചെയ്‌തുവെന്ന കുറ്റമാണ് ഇയാൾക്കെതിരെ ചുമത്തിയിരിക്കുന്നത്. കേസുമായി ബന്ധപ്പെട്ട് 5000 പേജുള്ള കുറ്റപത്രമാണ് എൻഐഎ കോടതിയിൽ സമർപ്പിച്ചിരിക്കുന്നത്.
കേരളത്തിലും കർണാടകയിലും ആക്രമണത്തിന് പദ്ധതിയിട്ടെന്നായിരുന്നു അമീനെതിരായ കുറ്റപത്രം വിശദമാക്കുന്നത്. ടെലഗ്രാം, ഹൂപ്പ്, ഇന്‍സ്റ്റഗ്രാം അടക്കമുള്ള സമൂഹമാധ്യമ പ്ലാറ്റ്ഫോമുകളിലൂടെ ഐഎസ്ഐഎസ് ആശയപ്രചാരണം നടത്തുകയും ഐഎസ്ഐഎസിലേക്ക് പുതിയ ആളുകളെ റിക്രൂട്ട് ചെയ്ത് ധ്രുവീകരണത്തിന് ശ്രമിച്ചുവെന്നും എൻ.ഐ.എ വ്യക്തമാക്കി. ശനിയാഴ്ച രാവിലെ ലോക്കൽ പോലീസ് മുഖേന ജയിൽ അധികൃതർ വീട്ടുകാരെ വിവരം അറിയിച്ചതായി അമീന്റെ ഭാര്യാപിതാവ് മായിൻ കുട്ടി പറഞ്ഞു.
കേരളത്തിലെ മലപ്പുറം ജില്ലയിലെ മങ്കട എന്ന പട്ടണത്തിലെ താമസക്കാരനാണ് അമീൻ. എൻഐഎ ഡൽഹിയിൽ അറസ്റ്റിലാകുന്നതിന് മുമ്പ് ഇസ്ലാമിക് കോഴ്‌സിൽ ചേരാൻ ഇയാൾ ബെംഗളൂരുവിലേക്ക് മാറി. 2020 മാര്‍ച്ച് മാസത്തില്‍ കശ്മീര്‍ സന്ദര്‍ശിച്ച മുഹമ്മദ് അമീന്‍ അവിടെ തീവ്രവാദ പ്രവര്‍ത്തനങ്ങളില്‍ ഏര്‍പ്പെട്ടതായും എന്‍ഐഎ ആരോപിക്കുന്നുണ്ട്. ഐഎസ്ഐഎസിന്‍റെ അക്രമസ്വഭാവമുള്ള ആശയ പ്രചാരണത്തിന് ഫണ്ട് ശേഖരണം നടത്തിയെന്നും എന്‍ഐഎ നേരത്തെ വിശദമാക്കിയിരുന്നു.
Post Your Comments