രാജ്യവിരുദ്ധ പ്രവർത്തനങ്ങൾ ചെയ്‌താൽ മദ്രസകൾ പൊളിച്ച് കളയും: അസം മുഖ്യമന്ത്രി

അസം: രാജ്യവിരുദ്ധ പ്രവര്‍ത്തനങ്ങള്‍ നടത്തുന്നതായി വിവരം ലഭിച്ചാല്‍ മദ്രസകള്‍ ഇടിച്ചുനിരത്തുമെന്ന് അസം മുഖ്യമന്ത്രി ഹിമന്ത ബിശ്വ ശര്‍മ. അസമിലെ ബൊംഗായ്ഗാവില്‍ കഴിഞ്ഞ ദിവസം ഒരു മദ്രസ ജെസി.ബി ഉപയോഗിച്ച് തകര്‍ത്തിരുന്നു. അല്‍ഖ്വയ്ദ ബന്ധമാരോപിച്ച് ഒരുമാസത്തിനിടെ മൂന്നു മദ്രസകളാണ് അസമില്‍ തകര്‍ത്തത്.

‘മദ്രസകള്‍ തകര്‍ക്കണമെന്ന് ഞങ്ങള്‍ ആഗ്രഹിക്കുന്നില്ല. അവ ഇത്തരത്തിലുള്ള ജിഹാദികള്‍ ഉപയോഗിക്കാതിരിക്കുക എന്നത് മാത്രമാണ് ലക്ഷ്യമിടുന്നത്. മദ്രസയുടെ മറവില്‍ ഇന്ത്യാവിരുദ്ധ പ്രവര്‍ത്തനങ്ങള്‍ നടക്കുന്നതായി സര്‍ക്കാറിന് വിവരം ലഭിച്ചാല്‍ അത് ഞങ്ങള്‍ തകര്‍ക്കും’, മുഖ്യമന്ത്രി പറഞ്ഞു.

ബംഗ്ലാദേശ് ആസ്ഥാനമായ തീവ്രവാദ സംഘടനയുമായുള്ള ബന്ധത്തിന്റെ പേരില്‍ അഞ്ചുപേര്‍ അറസ്റ്റിലായതിന് പിന്നാലെയാണ് അസമില്‍ മദ്രസകള്‍ ലക്ഷ്യമിട്ട് നടപടി തുടങ്ങിയത്. കഴിഞ്ഞ വർഷം ഒക്‌ടോബർ മുതൽ, ഇന്ത്യൻ ഉപഭൂഖണ്ഡത്തിലെ (എക്യുഐഎസ്) അൽ-ഖ്വയ്ദയുടെയും ബംഗ്ലാദേശ് ആസ്ഥാനമായുള്ള അൻസറുല്ല ബംഗ്ലാ ടീമിന്റെയും ഭീഷണിയെക്കുറിച്ച് എല്ലാ സുരക്ഷാ ഏജൻസികളും മുന്നറിയിപ്പ് നൽകിയിരുന്നു. ഇതിന്റെ ഭാഗമായി അസമിൽ അതീവ ജാഗ്രത പുലർത്തിയിരുന്നു. മാർച്ച് മുതൽ, 40-ലധികം AQIS/ABT പ്രവർത്തകരെ അസമിൽ നിന്നും അറസ്റ്റ് ചെയ്തു.

അസം ഇസ്ലാമിക മതമൗലികവാദികളുടെ കേന്ദ്രമായി മാറുകയാണെന്ന വ്യക്തമായ റിപ്പോർട്ടുകൾ ലഭിച്ചതിനെ തുടർന്നാണ് തീവ്രവാദ പ്രവർത്തനങ്ങൾക്കെതിരെ സർക്കാർ ശക്തമായ നടപടികൾ സ്വീകരിച്ച് തുടങ്ങിയത്. കൂട്ട അറസ്റ്റുകൾക്കും തീവ്രവാദം പ്രചരിപ്പിക്കുന്ന മദ്രസകൾ പൊളിച്ച് നീക്കുന്നതിലേക്കും സർക്കാരിനെ നയിച്ചത് ഇത്തരം റിപ്പോർട്ടുകൾ ആണ്. AQIS/ABT അസമിലെ സ്വകാര്യ മദ്രസകളെ ലക്ഷ്യമിട്ട് കൂടുതൽ ആഴത്തിൽ നുഴഞ്ഞുകയറാൻ തുടങ്ങിയതോടെയാണ് പോലീസ് ഈ സ്ഥാപനങ്ങളിലേക്ക് ശ്രദ്ധ തിരിച്ചത്.