ലൈം​ഗിക ബന്ധവും ​ഗർഭപാത്രവും ബീജവുമില്ലാതെ ഭ്രൂണം വളർത്തിയെടുത്ത് ഗവേഷകർ: ചരിത്ര നേട്ടം

ബീജവും ഗർഭപാത്രവുമില്ലാതെ ഭ്രൂണം വളർത്തിയെടുത്ത് ​ഗവേഷകർ. എലിയുടെ സിന്തറ്റിക് ഭ്രൂണമാണ് ശാസ്ത്രജ്ഞർ വിജയകരമായി വളർത്തിയിരിക്കുന്നത്. കാംബ്രിഡ്ജ് സർവകലാശാലയിലെ ശാസ്ത്രജ്ഞരാണ് ഈ ചരിത്രനേട്ടത്തിന് പിന്നിൽ. ജീവന്റെ സ്വാഭാവിക പ്രക്രിയയായ അണ്ഡ- ബീജ സങ്കലനം ഇല്ലാതെയാണ് ശാസ്ത്രജ്ഞർ ലാബിൽ എലിയുടെ ഭ്രൂണം വികസിപ്പിച്ചെടുത്തതത്.

എലികളിൽ നിന്നുള്ള സ്റ്റെം സെല്ലുകൾ ഉപയോഗിച്ച് മസ്തിഷ്‌കം, മിടിക്കുന്ന ഹൃദയം, മറ്റ് അവയവങ്ങൾ എന്നിവയുള്ള ഭ്രൂണമാണ് ശാസ്ത്രജ്ഞർ വിജയകരമായി വികസിപ്പിച്ചിരിക്കുന്നത്. ശരീരത്തിലെ മാസ്റ്റർ സെല്ലുകൾ ഈ പ്രക്രിയയിലെ നിർണായക ഘടകമാണ്. ഇവ ശരീരത്തിലെ മറ്റ് അവയവങ്ങളുടെ വളർച്ചയ്ക്ക് കാരണമാകുന്നു. ബീജസങ്കലനത്തിനു ശേഷം എട്ടര ദിവസങ്ങൾക്ക് ശേഷമാണ് ഭ്രൂണം വികസിപ്പിച്ചെടുത്തത്. അതിൽ സ്വാഭാവിക ഘടനയുടെ അതേ സ്വഭാവം അടങ്ങിയിരിക്കുന്നു.

ഈ നേട്ടം സസ്തനികളുടെ വികാസത്തെ പുനർനിർമ്മിക്കുന്നതിനുള്ള ഭ്രൂണത്തിന്റെയും രണ്ട് തരം എക്സ്ട്രാ-എംബ്രിയോണിക് സ്റ്റെം സെല്ലുകളുടെയും സ്വയം-ഏകോപന കഴിവ് തെളിയിക്കുന്നു എന്നാണ് നേച്ചർ ജേണലിൽ പ്രസിദ്ധീകരിച്ച പഠനം പറയുന്നത്. എന്നാലും, ഒരു മനുഷ്യ ഭ്രൂണം വിജയകരമായി വികസിക്കുന്നതിന്, ഭ്രൂണമായി മാറുന്ന കോശങ്ങളും ഭ്രൂണത്തെ അമ്മയുമായി ബന്ധിപ്പിക്കുന്ന കോശങ്ങളും തമ്മിൽ സമ്പർക്കം നടത്തേണ്ടതുണ്ടെന്നാണ് ഗവേഷകർ പറയുന്നത്.

കൃത്രിമ ഭ്രൂണം വികസിപ്പിക്കുന്നതിനുള്ള ആദ്യ പഠനമല്ല ഇത്. ഇസ്രായേലി ശാസ്ത്രജ്ഞർ അടുത്തിടെ പെട്രി ഡിഷിൽ സംസ്‌കരിച്ച സ്റ്റെം സെല്ലുകൾ ഉപയോഗിച്ച് ഗർഭാശയത്തിന് പുറത്ത് ഒരു കൃത്രിമ ഭ്രൂണം വികസിപ്പിച്ചെടുത്തിരുന്നു.