ത്രിപുരസുന്ദരി അഷ്ടകം

കദംബവനചാരിണീം മുനികദംബകാദംബിനീം
നിതംബജിത ഭൂധരാം സുരനിതംബിനീസേവിതാം ।
നവാംബുരുഹലോചനാമഭിനവാംബുദശ്യാമലാം
ത്രിലോചനകുടുംബിനീം ത്രിപുരസുന്ദരീമാശ്രയേ ॥ 1॥

കദംബവനവാസിനീം കനകവല്ലകീധാരിണീം
മഹാര്‍ഹമണിഹാരിണീം മുഖസമുല്ലസദ്വാരുണീം ।
ദയാവിഭവകാരിണീം വിശദലോചനീം ചാരിണീം
ത്രിലോചനകുടുംബിനീം ത്രിപുരസുന്ദരീമാശ്രയേ ॥ 2॥

കദംബവനശാലയാ കുചഭരോല്ലസന്‍മാലയാ
കുചോപമിതശൈലയാ ഗുരുകൃപാലസദ്വേലയാ ।
മദാരുണകപോലയാ മധുരഗീതവാചാലയാ
കയാഽപി ഘനനീലയാ കവചിതാ വയം ലീലയാ ॥ 3॥

കദംബവനമധ്യഗാം കനകമണ്ഡലോപസ്ഥിതാം
ഷഡംബുരുഹവാസിനീം സതതസിദ്ധസൌദാമിനീം ।
വിഡംബിതജപാരുചിം വികചചംദ്രചൂഡാമണിം
ത്രിലോചനകുടുംബിനീം ത്രിപുരസുന്ദരീമാശ്രയേ ॥ 4॥

കുചാഞ്ചിതവിപഞ്ചികാം കുടിലകുന്തലാലംകൃതാം
കുശേശയനിവാസിനീം കുടിലചിത്തവിദ്വേഷിണീം ।
മദാരുണവിലോചനാം മനസിജാരിസമ്മോഹിനീം
മതങ്ഗമുനികന്യകാം മധുരഭാഷിണീമാശ്രയേ ॥ 5॥

സ്മരപ്രഥമപുഷ്പിണീം രുധിരബിന്ദുനീലാംബരാം
ഗൃഹീതമധുപാത്രികാം മദവിഘൂര്‍ണനേത്രാഞ്ചലാം ।
ഘനസ്തനഭരോന്നതാം ഗലിതചൂലികാം ശ്യാമലാം
ത്രിലോചനകുടുംബിനീം ത്രിപുരസുന്ദരീമാശ്രയേ ॥ 6॥

സകുങ്കുമവിലേപനാമലകചുംബികസ്തൂരികാം
സമന്ദഹസിതേക്ഷണാം സശരചാപപാശാങ്കുശാം ।
അശേഷജനമോഹിനീമരുണമാല്യ ഭൂഷാംബരാം
ജപാകുസുമഭാസുരാം ജപവിധൌ സ്മരാംയംബികാം ॥ 7॥

പുരംദരപുരംധ്രികാം ചികുരബന്ധസൈരംധ്രികാം
പിതാമഹപതിവ്രതാം പടപടീരചര്‍ചാരതാം ।
മുകുന്ദരമണീമണീലസദലംക്രിയാകാരിണീം
ഭജാമി ഭുവനാംബികാം സുരവധൂടികാചേടികാം ॥ 8॥

॥ ഇതി ശ്രീമദ് ശംകരാചാര്യവിരചിതം
ത്രിപുരസുന്ദരീഅഷ്ടകം സമാപ്തം ॥