‘ടാർഗെറ്റ്’: കമലേഷ് തിവാരിയുടെ ഭാര്യയ്ക്ക് വധ ഭീഷണി, സന്ദേശത്തിൽ യോഗി ആദിത്യനാഥിന്റെ ചിത്രം മാർക് ചെയ്ത നിലയിൽ

രാജസ്ഥാനിലെ ഉദയ്പൂരിൽ പട്ടാപ്പകൽ തയ്യൽക്കാരനെ കൊലപ്പെടുത്തിയതിന് പിന്നാലെ, തന്നെ കൊല്ലുമെന്ന് ഭീഷണിപ്പെടുത്തി ഒരു അജ്ഞാത കത്ത് തനിക്ക് ലഭിച്ചതായി, 2018 ൽ കൊല്ലപ്പെട്ട ഹിന്ദു സമാജ് പാർട്ടി നേതാവ് കമലേഷ് തിവാരിയുടെ ഭാര്യ. ജൂൺ 22-ന് ലഖ്‌നൗവിലെ തന്റെ വീടിനുള്ളിൽ നിന്ന് വെള്ള കവറിൽ ഒരു ഭീഷണിക്കത്ത് താൻ കണ്ടെത്തിയെന്ന് കിരൺ തിവാരി പറഞ്ഞു. ഉറുദു ഭാഷയിലാണ് ഭീഷണി സന്ദേശമെന്ന് കിരൺ ആരോപിക്കുന്നു.

പ്രധാനമന്ത്രി നരേന്ദ്ര മോദി, ഉത്തർപ്രദേശ് മുഖ്യമന്ത്രി യോഗി ആദിത്യനാഥ് എന്നിവരുൾപ്പെടെ നിരവധി ആളുകളുടെ ബ്ലാക്ക് ആൻഡ് വൈറ്റ് ഫോട്ടോകളും ഈ ഭീഷണി കത്തിൽ ഉണ്ടായിരുന്നു എന്നത് ശ്രദ്ധേയമാണ്. ഫോട്ടോകളിൽ വലിയ X അടയാളങ്ങൾ ഉണ്ടായിരുന്നു, അതിനടുത്തായി കൈകൊണ്ട് ‘ടാർഗെറ്റ്’ എന്ന് എഴുതിയിരിക്കുന്നത് കാണാം. വിഷയത്തിൽ പരാതി ലഭിച്ചിട്ടുണ്ടെന്നും അന്വേഷണം നടത്തിവരികയാണെന്നും പോലീസ് പറഞ്ഞു.

2015 ഡിസംബറിൽ മുഹമ്മദ് നബിയെക്കുറിച്ച് ആക്ഷേപകരമായ പരാമർശങ്ങൾ നടത്തിയതിന് ശേഷം തിവാരി വാർത്തകളിൽ ഇടം നേടിയിരുന്നു. അദ്ദേഹത്തിന്റെ പ്രസ്താവനകൾ വിവിധ മുസ്ലീം ഗ്രൂപ്പുകളുടെ പ്രതിഷേധത്തിന് കാരണമായി. പലയിടത്തും പ്രതിഷേധങ്ങൾ പൊട്ടിപ്പുറപ്പെട്ടിരുന്നു. ചില പ്രതിഷേധ സംഘടനകൾ അദ്ദേഹത്തിന്റെ തല വെട്ടണമെന്ന് ആക്രോശിച്ചിരുന്നു. ഉത്തർപ്രദേശിലെ മുസഫർനഗറിലും രാജസ്ഥാനിലെ ടോങ്കിലും പ്രതിഷേധക്കാർ കമലേഷ് തിവാരിയുടെ തല വെട്ടണമെന്ന് ആവശ്യപ്പെട്ടിരുന്നു.

ആരാണ് കമലേഷ് തിവാരി?

വലതുപക്ഷ സംഘടനയായ ഹിന്ദു സമാജ് പാർട്ടിയുടെ പ്രസിഡന്റായ കമലേഷ് തിവാരിയെ 2018 ഒക്ടോബർ 18 ന് ലഖ്‌നൗവിൽ വെച്ച് കൊലപ്പെടുത്തുകയായിരുന്നു. ഉത്തർപ്രദേശ് തലസ്ഥാനത്തെ അദ്ദേഹത്തിന്റെ ഓഫീസിൽ വെച്ചായിരുന്നു ദാരുണ സംഭവം. ഫരീദ്-ഉദ്-ദിൻ ഷെയ്ഖും അഷ്ഫാക് ഷെയ്ഖും ചേർന്നായിരുന്നു അദ്ദേഹത്തെ കൊലപ്പെടുത്തിയത്. ആക്രമണത്തിനിടെ, ഒരു അക്രമി അയാളുടെ കഴുത്ത് അറുത്തു, മറ്റൊരാൾ അയാൾക്ക് നേരെ വെടിയുതിർത്തു. ആശുപത്രിയിൽ ചികിത്സയിൽ കഴിയവെയാണ് അദ്ദേഹം കൊല്ലപ്പെടുന്നത്. പോസ്റ്റ്‌മോർട്ടം റിപ്പോർട്ട് പ്രകാരം തിവാരിക്ക് 15 തവണ കുത്തേറ്റിട്ടുണ്ട്.

ഗുജറാത്ത് തീവ്രവാദ വിരുദ്ധ സ്ക്വാഡ് മുമ്പ് കസ്റ്റഡിയിലെടുത്ത രണ്ട് ഐ.എസ്.ഐ.എസ് പ്രതികൾ 2017 ൽ കമലേഷ് തിവാരിയെ കൊല്ലാൻ ആഗ്രഹിക്കുന്നുവെന്ന് സമ്മതിച്ചിരുന്നു. അൽ-ഹിന്ദ് ബ്രിഗേഡ്, അധികം അറിയപ്പെടാത്ത ഗ്രൂപ്പാണ് തിവാരിയുടെ മരണത്തിന്റെ ഉത്തരവാദിത്തം ഏറ്റെടുത്തത്. തിവാരിയുടെ കൊലപാതകത്തിൽ ഉൾപ്പെട്ട ആറ് പ്രതികളെ സൂറത്ത് പോലീസും ഗുജറാത്ത് എടിഎസും ഉത്തർപ്രദേശ് പോലീസും കസ്റ്റഡിയിലെടുത്തിരുന്നു. കൊലപാതകത്തിന് ഉപയോഗിച്ച പിസ്റ്റൾ സൂറത്തിൽ നിന്ന് വാങ്ങിയതാണെന്നും കൊലപാതകം ആസൂത്രണം ചെയ്തത് ദുബായിൽ വെച്ചാണെന്നും പ്രതികൾ കുറ്റസമ്മതം നടത്തി. പ്രവാചകൻ മുഹമ്മദിനെക്കുറിച്ചുള്ള തിവാരിയുടെ പരാമർശമാണ് കൊലപാതകത്തിന് പ്രേരിപ്പിച്ചതെന്നും അവർ സ്ഥിരീകരിച്ചു.