കരിപ്പൂരില്‍ വീണ്ടും വന്‍ സ്വര്‍ണ്ണവേട്ട: രണ്ടേമുക്കാൽ കിലോ പിടികൂടിയത് കസ്റ്റംസ് പരിശോധനയ്ക്ക് ശേഷം

കോഴിക്കോട്: കരിപ്പൂർ വിമാനത്താവളത്തിൽ നിന്നും വീണ്ടും വലിയ തോതിൽ സ്വർണ്ണം പിടിച്ചു. രണ്ടേമുക്കാല്‍ കിലോ സ്വർണ്ണ മിശ്രിതമാണ് യാത്രക്കാരനിൽ നിന്ന് പിടികൂടിയത്. ബെഹ്റൈനില്‍ നിന്നും എയര്‍ ഇന്ത്യാ എക്സ്പ്രസ്സില്‍ എത്തിയ ബാലുശേരി സ്വദേശി അബ്ദുസലാമാണ് പിടിയിലായത്. ഒന്നരക്കോടി രൂപ വില വരുന്ന സ്വർണ്ണമാണ് പിടികൂടിയത്.

മിശ്രിത രൂപത്തിലുള്ള 2018 ഗ്രാം സ്വര്‍ണ്ണം പ്ലാസ്റ്റിക് കവറിലാക്കി അരയിൽ കെട്ടിവച്ചും മൂന്നു സ്വർണ്ണ ഉരുളകൾ ശരീരത്തിലെ രഹസ്യ ഭാഗത്ത് ഒളിപ്പിച്ചുമാണ് കടത്തിയത്. കസ്റ്റംസ് പരിശോധന പൂർത്തിയാക്കി പുറത്തിറങ്ങിയ ശേഷമാണ് പൊലീസ് സ്വർണ്ണം പിടികൂടിയത്.

അതേസമയം, കഴിഞ്ഞ ദിവസം കരിപ്പൂര്‍ വിമാനത്താവളം വഴി കടത്താന്‍ ശ്രമിച്ച 2 കിലോയിലധികം സ്വര്‍ണ്ണ മിശ്രിതം കോഴിക്കോട് കസ്റ്റംസ് പ്രിവന്റീവ് വിഭാഗം പിടികൂടി. ഇന്‍ഡിഗോ വിമാനത്തില്‍ എത്തിയ തൃത്താല സ്വദേശിയില്‍ നിന്നാണ് സ്വര്‍ണ്ണ മിശ്രിതം പിടികൂടിയത്. വാങ്ങാനെത്തിയ പേരാമ്പ്ര സ്വദേശി അഷ്റഫിനേയും അറസ്റ്റ് ചെയ്തു. 2 മാസത്തിനിടെ കരിപ്പൂരിൽ 14 കോടിയുടെ സ്വർണ്ണമാണ് പൊലീസ് പിടിച്ചത്.