പത്തനംതിട്ട : കുപ്രസിദ്ധ മോഷ്ടാവ് ‘ജിമ്മൻ സജിത്തി’നെ പോലീസ് പിടികൂടി. പത്തനംതിട്ട, കൊല്ലം, ആലപ്പുഴ ജില്ലകളിലെ വിവിധ പോലീസ് സ്റ്റേഷനുകളിലെ പിടിച്ചുപറി, മോഷണ കേസുകളിലെ പ്രതിയാണ് കായംകുളം കൃഷ്ണപുരം സ്വദേശിയായ സച്ചു എന്ന സജിത്ത് കുമാർ (36). ഇയാളെ പിടികൂടാൻ ശ്രമിക്കുമ്പോഴൊക്കെ, പോലീസിനെ വിദഗ്ധമായി വെട്ടിച്ച് രക്ഷപ്പെടുകയായിരുന്നു പതിവ്. രണ്ടു ദിവസം മുമ്പ് പിടിച്ചുപറി നടത്തിയ ശേഷം പലയിടങ്ങളിൽ കറങ്ങി നടന്ന മോഷ്ടാവ്, അടൂർ എസ്‌ഐ എം മനേഷ് തന്ത്രപരമായി നടത്തിയ നീക്കത്തിലാണ് കുടുങ്ങിയത്.
പന്തളം, കോന്നി, അടൂർ എന്നീ സ്‌റ്റേഷനുകളിലും കൊല്ലം, ആലപ്പുഴ ജില്ലകളിലെ വിവിധ സ്‌റ്റേഷനുകളിലും സച്ചുവിനെതിരെ കേസുകളുണ്ട്. മോഷ്ടിച്ച ബൈക്കിൽ കറങ്ങി നടന്നാണ് ഇയാൾ പിടിച്ചുപറി നടത്തിയിരുന്നത്. ആലപ്പുഴ, കൊല്ലം, മാവേലിക്കര എന്നിവിടങ്ങളിലുള്ള പോലീസ് സ്‌പെഷ്യൽ സ്‌ക്വാഡുകൾ കാലങ്ങളായി തെരഞ്ഞു കൊണ്ടിരുന്ന അന്തർ ജില്ലാ മോഷ്ടാവാണ് ഇയാൾ.
Post Your Comments