ബീഹാറിൽ നിർത്തിയിട്ടിരുന്ന ട്രെയിനിന് തീപിടിച്ചു

പറ്റ്‌ന: ബീഹാറില്‍ നിര്‍ത്തിയിട്ടിരുന്ന ട്രെയിനിന് തീപിടിച്ചു. ജയനഗറിൽ നിന്ന് ഡൽഹിയിലേക്ക് സർവ്വീസ് നടത്തുന്ന സ്വതന്ത്രത സേനാനി എക്‌സ്പ്രസിലാണ് തീപിടിച്ചത്. ട്രെയിനിന്റെ മൂന്ന് കോച്ചുകളിലാണ് തീ പടർന്നത്. രണ്ട് കോച്ചുകളിൽ പടർന്ന തീ മൂന്നാമത്തെ കോച്ചിലേക്കും വ്യാപിക്കുകയായിരുന്നുവെന്ന് ഈസ്റ്റേൺ റെയിൽവേ വൃത്തങ്ങൾ പറഞ്ഞു.

രാവിലെ 9 മണിയോടെയായിരുന്നു സംഭവം. തുടർന്ന് അഗ്നിശമന സേന യൂണിറ്റുകൾ എത്തിയാണ് തീ അണച്ചത്. 9.50 ഓടെ തീ പൂർണമായി അണച്ചതായി റെയിൽവേ അറിയിച്ചു. തീപിടിക്കാനുളള കാരണം വ്യക്തമായിട്ടില്ല. ഇതേക്കുറിച്ച് അന്വേഷണം ആരംഭിച്ചിട്ടുണ്ട്.

Read Also  :  യുഎഇയിൽ കോവിഡ് വ്യാപനം കുറയുന്നു: ഇന്ന് സ്ഥിരീകരിച്ചത് 790 കേസുകൾ

കോച്ചുകളിൽ തീ ആളിപ്പടരുന്നതിന്റെയും വലിയ തോതിൽ പുക തീവണ്ടിയുടെ ജനാലകളിൽ കൂടി പുറത്തേക്ക് വരുന്നതിന്റെയും ദൃശ്യങ്ങൾ സോഷ്യൽമീഡിയയിൽ പ്രചരിക്കുന്നുണ്ട്. ആളുകൾ ഇല്ലാത്തതിനാലാണ് വലിയ ദുരന്തം ഒഴിവായത്.  തീ അണയ്‌ക്കാൻ പോലീസിന്റെയും സഹായം  ലഭ്യമായതായി റെയിൽവേ അറിയിച്ചു.