ലത മങ്കേഷ്കറുടെ നിര്യാണം: ആദര സൂചകമായി യു.പി പ്രകടന പത്രിക പ്രകാശനം ബി.ജെ.പി മാറ്റിവെച്ചു

ലഖ്‌നൗ: അന്തരിച്ച ഗായിക ലതാ മങ്കേഷ്കറിനോടുള്ള ആദരസൂചകമായി ഉത്തർപ്രദേശ് നിയമസഭാ തെരഞ്ഞെടുപ്പ് പ്രകടന പത്രിക പ്രകാശനം ബി.ജെ.പി മാറ്റിവെച്ചു. ഗായികയുടെ മരണത്തെ തുടർന്ന്​ രാജ്യം രണ്ട് ദിവസത്തെ ദുഃഖാചരണം പ്രഖ്യാപിച്ചിട്ടുണ്ട്​. സംസ്കാര ചടങ്ങുകൾ ഞായറാഴ്ച വൈകീട്ട് മുംബൈ ശിവാജി പാർക്കിൽ നടക്കും. പ്രധാനമന്ത്രി നരേന്ദ്ര മോദി ചടങ്ങിൽ സംബന്ധിക്കും.

Also Read : സിൽവർ ലൈൻ പദ്ധതിയുടെ കടബാധ്യത യാത്രക്കാരെകൊണ്ട് മാത്രം തീർക്കാൻ കഴിയുമോയെന്ന് സംശയം: റെയിൽവേ മന്ത്രാലയം

പ്രകടന പത്രിക പ്രകാശനത്തിന് കേന്ദ്രമന്ത്രി അമിത് ഷാ, മുഖ്യമന്ത്രി യോഗി ആദിത്യനാഥ്, പാർട്ടി നേതാക്കളായ സ്വതന്ത്ര ദേവ്, കേശവ് മൗര്യ എന്നിവർ ഞായറാഴ്ച ലഖ്നൗവിലെത്തിയിരുന്നു. പരിപാടി നിർത്തിവെച്ച് ഇവർ ഗായികക്ക് വേണ്ടി രണ്ട് മിനിറ്റ് മൗനം ആചരിച്ചു.

പ്രകടന പത്രിക പുറത്തിറക്കുന്നതിനുള്ള പുതുക്കിയ തീയതി പിന്നീട് പ്രഖ്യാപിക്കുമെന്ന് ബി.ജെ.പി സംസ്ഥാന പ്രസിഡന്‍റ് സ്വതന്ത്ര ദേവ് സിംഗ് പറഞ്ഞു. യു.പിയിൽ ഫെബ്രുവരി 10നാണ്​ ഒന്നാംഘട്ട തെരഞ്ഞെടുപ്പ്​. തെരഞ്ഞെടുപ്പ്​ നടക്കുന്ന ഗോവയിലും ബി.ജെ.പിയുടെ പരിപാടികൾ മാറ്റിവെച്ചു.