ചങ്ങനാശ്ശേരിയിൽ ബൈക്കുകൾ കൂട്ടിയിടിച്ചു : മൂന്നു മരണം

ചങ്ങനാശ്ശേരി: എംസി റോഡിൽ എസ്ബി കോളേജിന് സമീപം ബൈക്കുകൾ കൂട്ടിയിടിച്ച് മൂന്ന് യുവാക്കൾ മരിച്ചു. ഹിദായത്ത് നഗർ പള്ളിപ്പറമ്പിലെ ഷാനവാസിന്റെയും ജെബിയുടെയും മകൻ അജ്മൽ റോഷൻ (27), ഫിഷ് മാർക്കറ്റ് ഉല്ലാഹയിൽ അലക്സ് (26), വാഴപ്പള്ളി കണിയാമ്പറമ്പിൽ രുദ്രാക്ഷ്(20) എന്നിവരാണ് മരിച്ചത്.

ഇന്നലെ രാത്രി പത്ത് മണിയോടെയാണ് സംഭവം നടന്നത്. ബൈക്കുകൾ കൂട്ടിയിടിച്ച് റോഡിൽ തെറിച്ചു വീണ യുവാക്കൾക്ക് ഗുരുതരമായി പരിക്കേറ്റിരുന്നു. നാട്ടുകാർ യുവാക്കളെ ജനറൽ ആശുപത്രിയിൽ എത്തിച്ചെങ്കിലും അജ്മൽ അപ്പോഴേക്കും മരിച്ചു.

പരിക്കേറ്റ രുദ്രാക്ഷിനെയും അലക്സിനെയും പിന്നീട് ചെത്തിപ്പുഴ സ്വകാര്യ ആശുപത്രിയിലേക്ക് മാറ്റിയെങ്കിലും, രാത്രി പന്ത്രണ്ടരയോടെ രണ്ടുപേരും മരിക്കുകയായിരുന്നു. അസ്വാഭാവിക മരണത്തിന് ചങ്ങനാശ്ശേരി പോലീസ് കേസ് രജിസ്റ്റർ ചെയ്തു.