സോഷ്യൽ മീഡിയ വഴി പരിചയപ്പെട്ട സുഹൃത്തുക്കൾ പ്രായപൂർത്തിയാകാത്ത പെൺകുട്ടിയെ പീഡിപ്പിച്ചു: മൂന്ന് പേർ അറസ്റ്റിൽ

കട്ടപ്പന: പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസില്‍ ഒരാൾ കൂടി അറസ്റ്റിൽ. പുഷ്പക്കണ്ടം ആനക്കല്ല് റോഡുവിള പുത്തന്‍വീട് അന്‍വര്‍ഷാ(22) ആണ് അറസ്റ്റിലായത്. കേസിൽ അറസ്റ്റിലാകുന്ന മൂന്നാമത്തെ ആളാണ് അൻവർഷാ. ഈ കേസില്‍ സൂര്യനെല്ലി സ്വദേശിയായ ശ്രീക്കുട്ടന്‍, കല്‍കൂന്തല്‍ സ്വദേശി രാജേഷ് എന്നിവരെ കഴിഞ്ഞ ദിവസം കട്ടപ്പന പോലീസ് അറസ്റ്റ് ചെയ്തിരുന്നു.

Also Read:തകരാറില്ലാത്ത റോഡിനു മുകളിൽ വീണ്ടും ടാറിങ് നടത്തി പൊതുമരാമത്ത് വകുപ്പ്: പ്രതിഷേധവുമായി നാട്ടുകാർ

പെണ്‍കുട്ടി പ്ലസ്​വണ്ണിന് പഠിക്കുമ്പോള്‍ ഇന്‍സ്റ്റഗ്രാം മുഖേന പരിചയപ്പെട്ട അന്‍വര്‍ഷാ പെണ്‍കുട്ടിയെ ശാരീരികമായി ഉപദ്രവിച്ചിരുന്നു. ശേഷം ഇത് പറഞ്ഞ് ശല്യം ചെയ്തതോടെ, ഫേസ്‌ബുക്ക് വഴി പരിചയപ്പെട്ട മറ്റൊരു സുഹൃത്തായ ശ്രീക്കുട്ടനോട് പെൺകുട്ടി സഹായം ചോദിച്ചു. ശ്രീക്കുട്ടന്‍ അന്‍വര്‍ഷായെ ഭീഷണിപ്പെടുത്തിയതോടെ തുടര്‍ന്ന് ശല്യപ്പെടുത്തല്‍ ഉണ്ടായില്ല.

എന്നാൽ, ഇതിനുശേഷം ഇക്കാര്യം പറഞ്ഞ് ശ്രീക്കുട്ടൻ പെൺകുട്ടിയുമായി കൂടുതൽ അടുത്തു. ശ്രീക്കുട്ടൻ സുഹൃത്തുക്കളുടെ സഹായത്തോടെ പെണ്‍കുട്ടിയുടെ വീട്ടിലെത്തി പീഡിപ്പിക്കുകയായിരുന്നു. ഈ സംഭവത്തില്‍ ശ്രീക്കുട്ടനെയും സുഹൃത്ത് രാജേഷിനെയും കഴിഞ്ഞ ദിവസം പിടികൂടിയിരുന്നു. ചോദ്യം ചെയ്യലിനിടെയാണ് അൻവർഷായും മുൻപ് പെൺകുട്ടിയെ ശാരീരികമായി പീഡിപ്പിച്ചിരുന്നതായി വ്യക്തമായത്. ഇതോടെയാണ് അറസ്റ്റ്.