സാമൂഹികമാധ്യമങ്ങളിലെ വിലക്ക് : സ്വന്തം സോഷ്യൽ നെറ്റ്​വർക്ക്​ പ്ലാറ്റ്​​ഫോമുമായി ട്രംപ്

വാഷിംഗ്ടൺ : സോഷ്യൽമീഡിയയിൽ ഏർപ്പെടുത്തിയിരിക്കുന്ന വിലക്ക് മറികടക്കാൻ സ്വന്തം സോഷ്യൽ നെറ്റ്​വർക്ക്​ പ്ലാറ്റ്​​ഫോമുമായി മുൻ അമേരിക്കൻ പ്രസിഡന്റ് ഡോണൾഡ് ട്രംപ്. ട്വിറ്ററും, ഫേസ്​ബുക്കും വിലക്ക്​ ഒഴിവാക്കാത്ത പശ്​ചാത്തലത്തിലാണ്​ ട്രംപിന്‍റെ നടപടി. ‘ട്രൂത്ത്​ സോഷ്യൽ’ എന്ന് പേരിട്ട ആപ്പ് അടുത്ത മാസം പരീക്ഷണാടിസ്ഥാനത്തിൽ പ്രവർത്തനം ആരംഭിക്കും.

തുടക്കത്തിൽ തിരഞ്ഞെടുത്ത ചുരുക്കം ആൾക്കാർക്ക് മാത്രമായിരിക്കും ആപ്പ് ലഭ്യമാകുക. ട്രംപ് മീഡിയ ആൻഡ് ടെക്നോളജി ഗ്രൂപ്പിന്റെ കീഴിലായിരിക്കും പുതിയ ആപ്പ് പ്രവർത്തിക്കുക.സാമൂഹികമാധ്യമ ഭീമന്മാരുടെ അഹങ്കാരത്തിനെതിരെ പൊരാടാൻ വേണ്ടിയാണ് താൻ ഈ പുതിയ സാമൂഹികമാധ്യമം ആരംഭിക്കുന്നതെന്നും ട്രംപ് പറഞ്ഞു. അതേസമയം, കഴിഞ്ഞ മേയിൽ ട്രംപ് ‘ഫ്രം ദ ഡെസ്ക് ഒഫ് ഡൊണാൾഡ് ട്രംപ്’ എന്ന ഒരു ബ്ലോഗ് ആരംഭിച്ചിരുന്നു. എന്നാൽ, പൊതുജനങ്ങളിൽ നിന്ന് വേണ്ടത്ര പ്രതികരണം ലഭിക്കാതിരുന്നതിനെ തുടർന്ന് ഒരു മാസത്തിനുള്ളിൽ ബ്ലോഗ് നിർത്തിയിരുന്നു.

Read Also  :  ടി20 ലോകകപ്പ് സന്നാഹ മത്സരം: ഓസ്ട്രേലിയക്കെതിരെ ഇന്ത്യക്ക് തകർപ്പൻ ജയം

അമേരിക്കൻ പ്രസിഡന്റ് തിരഞ്ഞെടുപ്പുമായി ബന്ധപ്പെട്ട് ജനുവരിയിൽ നടന്ന അക്രമ സംഭവങ്ങളെ തുടർന്നാണ് ട്രംപിന് ഫേസ്ബുക്കും ട്വിറ്ററും വിലക്ക് ഏർപ്പെടുത്തിയിരിക്കുന്നത്. തന്റെ അനുയായികളുമായി സംവദിക്കുന്നതിന് ട്രംപ് ഏറ്റവും കൂടുതൽ ആശ്രയിച്ചിരുന്നത് ഈ രണ്ട് സാമൂഹികമാധ്യമങ്ങളെയുമായിരുന്നു. ഇതിന് പിന്നാലെ ഇൻസ്റ്റാഗ്രാം, ഷെയർ ചാറ്റ്, യൂട്യൂബ് എന്നിവയും ട്രംപിന് വിലക്കേർപ്പെടുത്തിയിട്ടുണ്ട്.