വടകര: വിവാഹം കഴിച്ച്‌ കൂടെ താമസിച്ച്‌ മുങ്ങിയ വ്യാപാരിക്കെതിരെ കേസ് നല്‍കിയ തന്നെയും മകനെയും ടി.പി. വധക്കേസില്‍ ജയിലില്‍ കഴിയുന്ന കൊടി സുനിയെ ഉപയോഗിച്ച്‌ അപായപ്പെടുത്തുമെന്ന് ഭീഷണിപ്പെടുത്തിയതായി യു.പി സ്വദേശിനി മുബഷിറ സമിയുള്ള ഖാന്‍ വാര്‍ത്തസമ്മേളനത്തില്‍ ആരോപിച്ചു.
വാർത്താസമ്മേളനത്തിൽ യുവതി പറയുന്നത്,
എട്ടുവര്‍ഷം മുമ്പ് മുംബെയില്‍നിന്ന് പരിചയപ്പെട്ട വ്യാപാരി പെരിങ്ങത്തൂര്‍ സി.കെ.പി. നൂറുദ്ദീന്‍ രണ്ടുവര്‍ഷം മുമ്പ് വിവാഹം കഴിച്ചിരുന്നു. പിന്നീട് നൂറുദ്ദീന്‍ നാട്ടിലേക്ക് മടങ്ങി. ഭര്‍ത്താവിനെ കുറിച്ച്‌ വിവരമില്ലാതായതോടെ ഒരുമാസം മുമ്പ് നാദാപുരത്ത് ഇയാളെ തേടി എത്തി.
പരാതിയില്‍ പൊലീസ് നൂറുദ്ദീനെ കണ്ടെത്തി കൂടെ വിട്ടയച്ചു. മാഹിയില്‍ നിന്ന് നൂറുദ്ദീന്‍ തന്നെ തനിച്ചാക്കി വീണ്ടും മുങ്ങി. ഇതോടെ കോടതിയെ സമീപിച്ചു. കോടതി നിര്‍ദേശത്തില്‍ പീഡനത്തിന് നാലുപേര്‍ക്കെതിരെ കേസെടുത്തു. മാഹിയില്‍ താമസിക്കുന്നതിനിടെ അവിടത്തെ പൊലീസ് ഉദ്യോഗസ്ഥന്‍ എത്തി പ്രതി സാദിഖിനെ കേസില്‍നിന്ന് ഒഴിവാക്കാന്‍ സമ്മര്‍ദം ചെലുത്തി.
ഇതോടെ താമസം വടകരയിലേക്ക് മാറ്റി. ഭീഷണിയെ തുടര്‍ന്ന് വടകരയിലെ താമസ സ്ഥലത്തുനിന്ന് ഇറങ്ങാന്‍ കഴിയാത്ത സ്ഥിതിയാണ്. തന്നെ സഹായിക്കുന്നവര്‍ക്കും ഭീഷണിയുണ്ട്. മുഖ്യമന്ത്രി, ഡി.ജി.പി, വനിത കമ്മീഷന്‍ എന്നിവര്‍ക്ക് ഇതുസംബന്ധിച്ച്‌ പരാതി നല്‍കുമെന്ന് യുവതി പറഞ്ഞു.
Post Your Comments