ന്യൂഡൽഹി: റിലയന്‍സ് ഇന്‍ഡസ്ട്രീസ് ലിമിറ്റഡ് (ആര്‍.ഐ.എല്‍) ഓഹരികളുടെ കുത്തനെയുള്ള വളര്‍ച്ചയ്ക്ക് പിന്നാലെ ചെയര്‍മാര്‍ മുകേഷ് അംബാനിയുടെ മൊത്തം ആസ്തി 100 ബില്യണ്‍ ഡോളറിലേക്ക് കുതിക്കുകയാണ്. അംബാനിയുടെ ആസ്തി വര്‍ധന ഏറ്റവും ഗുണം ചെയ്തിരിക്കുന്നത് റിലയന്‍സ് ഇന്‍ഡസ്ട്രീസ് ജീവനക്കാര്‍ക്കാണ്. പത്ത് മുതല്‍ 12 ശതമാനം വരെ ശമ്പള വര്‍ധനവാണ് കമ്പനി ഇപ്പോള്‍ പ്രഖ്യാപിച്ചിരിക്കുന്നത്.
ജീവനക്കാരുടെ പ്രകടനം കണക്കിലെടുക്കാതെ 2020-21 സാമ്പത്തിക വര്‍ഷത്തില്‍ റിലയന്‍സ് മുഴുവന്‍ ജീവനക്കാര്‍ക്കും ബോണസ് നല്‍കിയിരുന്നു. ബ്ലൂംബെര്‍ഗ് ബില്യണയേഴ്‌സ് സൂചിക പ്രകാരം ഇന്ത്യയിലെ ഏറ്റവും വലിയ ധനികനായ മുകേഷ് അംബാനിയുടെ ഇപ്പോഴത്തെ ആസ്തി 92.6 ബില്യണ്‍ ഡോളറാണ്. ആര്‍.ഐ.എല്‍ ഓഹരികളിലെ കുതിപ്പ് ഈ ആഴ്ച അംബാനിയുടെ മൊത്ത ആസ്തിയില്‍ 15.9 ബില്യണ്‍ ഡോളറിന്റെ വര്‍ധനവുണ്ടാക്കിയിട്ടുണ്ട്.
കഴിഞ്ഞ വര്‍ഷം കോവിഡ് മഹാമാരി കാരണം ജീവനക്കാരുടെ ശമ്പളം വെട്ടിക്കുറക്കുമെന്ന് റിലയന്‍സ് പ്രഖ്യാപിച്ചിരുന്നു. എന്നാല്‍, പിന്നീട് തീരുമാനം മാറ്റി മുഴുവന്‍ ശമ്പളവും നല്‍കുകയുമായിരുന്നു. കഴിഞ്ഞ വര്‍ഷം വരുമാന വര്‍ധനവ് ഉണ്ടായിരുന്നില്ല. തങ്ങളുടെ പെട്രോകെമിക്കല്‍സ് ബിസിനസിലെ 15 ലക്ഷത്തിലധികം വരുമാനമുള്ള ഉയര്‍ന്ന ഉദ്യോഗസ്ഥരുടെ ശമ്പളം റിലയന്‍സ് കഴിഞ്ഞ വര്‍ഷം ഏപ്രിലില്‍ 30-50 ശതമാനം വരെ വെട്ടിക്കുറച്ചിരുന്നു.
എന്നാല്‍, ഒക്ടോബറില്‍ കുറച്ച ശമ്പളം മുന്‍കാല പ്രാബല്യത്തോടെ തിരിച്ചുനല്‍കി. കമ്പനി തങ്ങളുടെ മറ്റ് ബിസിനസ്സുകളിലെ ശമ്പള വര്‍ദ്ധനവും ഇന്‍സെന്‍റീവുകളും ഉള്‍പ്പെടെ കോവിഡ് കാരണം കഴിഞ്ഞ വര്‍ഷം മരവിപ്പിച്ചിരുന്നു.
Post Your Comments