ടെസ്റ്റ് റാങ്കിംഗിൽ കോഹ്‌ലിയെ മറികടന്ന് രോഹിത് ശർമ

ദുബായ്: ടെസ്റ്റ് റാങ്കിംഗിൽ ഇന്ത്യൻ ഓപ്പണർ രോഹിത് ശർമയ്ക്ക് മുന്നേറ്റം. ഇംഗ്ലണ്ടിനെതിരെയായ മികച്ച പ്രകടനമാണ് താരത്തിന് തുണയായത്. പുതുക്കിയ ടെസ്റ്റ് റാങ്കിംഗ് പട്ടികയിൽ കോഹ്‌ലിയെ മറികടന്ന് രോഹിത് ശർമയാണ് ഇപ്പോൾ അഞ്ചാം സ്ഥാനത്ത്. 773 റേറ്റിംഗാണ് രോഹിത് ശർമക്കുള്ളത്. നിലവിൽ കോഹ്ലി ആറാം സ്ഥാനത്താണ്. യുവ വിക്കറ്റ് കീപ്പർ റിഷഭ് പന്ത് 12-ാം സ്ഥാനത്തേക്ക് പിന്തള്ളപ്പെട്ടു.

2017 നവംബറിന് ശേഷം ഇതാദ്യമായാണ് കോഹ്‌ലി അല്ലാതെ മറ്റൊരു ഇന്ത്യൻ ബാറ്റ്സ്മാൻ റാങ്കിങ്ങിൽ മുന്നിട്ടുനിൽക്കുന്നത്. ആറാം സ്ഥാനത്തുള്ള കോഹ്‌ലിക്ക് 766 റേറ്റിംഗാണുള്ളത്. ഇംഗ്ലണ്ടിനെതിരായ ടെസ്റ്റ് പരമ്പരയിലെ ഫോമില്ലായ്മയാണ് കോഹ്‌ലിക്ക് തിരിച്ചടിയായത്.

Read Also:- ടി20 ക്രിക്കറ്റിലെ കറുത്ത കുതിരകൾ: ന്യൂസിലൻഡിനെയും നാണംകെടുത്തി ബംഗ്ലാദേശ്

ഇന്ത്യയ്ക്കെതിരായ ടെസ്റ്റ്‌ പരമ്പരയിൽ മികച്ച പ്രകടനം പുറത്തെടുത്ത ഇംഗ്ലീഷ് ക്യാപ്റ്റൻ ജോ റൂട്ടാണ് പട്ടികയിൽ ഒന്നാം സ്ഥാനത്ത്. 916 ആണ് ഇംഗ്ലീഷ് നായകന്റെ റേറ്റിംഗ്. രണ്ടാം സ്ഥാനത്ത് ന്യൂസിലൻഡ് ക്യാപ്റ്റൻ കെയിൻ വില്യംസണും മൂന്നാമത് ഓസീസ് താരം സ്റ്റീവ് സ്മിത്തുമാണുള്ളത്. ഓസ്ട്രേലിയൻ താരം മാർനസ് ലബുഷെയ്നയാണ് നാലാം സ്ഥാനത്ത്.