ന്യൂഡല്‍ഹി: രാജ്യത്ത് ഒക്ടോബര്‍ അവസാനത്തോടെ കോവിഡ് മൂന്നാം തരംഗം അതീവഗുരുതരമായി കുട്ടികളില്‍ രോഗവ്യാപനം ഉണ്ടായേക്കാമെന്ന് വിദഗ്ധ സമിതി മുന്നറിയിപ്പ്. കേന്ദ്ര ആഭ്യന്തര മന്ത്രാലയത്തിന് കീഴിലെ നാഷനല്‍ ഇന്‍സ്റ്റിറ്റ്യൂട്ട് ഓഫ് ഡിസാസ്റ്റര്‍ മാനേജ്മെന്‍റ് രൂപവത്കരിച്ച വിദഗ്ധ സമിതി പ്രധാനമന്ത്രിയുടെ ഓഫിസിന് സമര്‍പ്പിച്ച റിപ്പോര്‍ട്ടിലാണ് ഇക്കാര്യം ചൂണ്ടിക്കാട്ടുന്നത്. മൂന്നാം തരംഗത്തില്‍ പ്രതിദിനം നാലു ലക്ഷം വരെ പേര്‍ക്ക് രോഗം ബാധിച്ചേക്കാമെന്നാണ് നിതി ആയോഗ് ചൂണ്ടിക്കാട്ടുന്നത്. രാജ്യത്ത് രണ്ടു ലക്ഷം ഐ.സി.യു ബെഡുകള്‍ സജ്ജമാക്കണമെന്ന് നിതി ആയോഗ് അംഗം വി.കെ. പോള്‍ കേന്ദ്രത്തോട് ആവശ്യപ്പെട്ടു.
രണ്ടാം കോവിഡ് തരംഗത്തില്‍ അടിസ്ഥാന സൗകര്യങ്ങളുടെ അഭാവം പ്രകടമായിരുന്നുവെന്നും റിപ്പോര്‍ട്ടില്‍ പറയുന്നു. മൂന്നാം തരംഗം സംബന്ധിച്ച്‌ നിതി ആയോഗും കേന്ദ്രത്തിന് മുന്നറിയിപ്പ് നല്‍കിയിട്ടുണ്ട്. മൂന്നാം തരംഗം കുട്ടികളെ അതിഗുരുതരമായി ബാധിക്കുമെന്നതിന് ജൈവശാസ്ത്രപരമായി തെളിവുകളില്ല. എന്നാല്‍, മുതിര്‍ന്നവര്‍ക്ക് ഉണ്ടായ പ്രശ്നങ്ങള്‍ കുട്ടികള്‍ക്കും ഉണ്ടാകാം.
കുട്ടികളില്‍ വ്യാപക രോഗബാധ ഉണ്ടാകാനുള്ള സാധ്യത കണക്കിലെടുത്ത് ശിശുരോഗ ചികിത്സാ സംവിധാനങ്ങളും ഡോക്ടര്‍മാര്‍ ഉള്‍പ്പെടെ ജീവനക്കാരെയും വെന്‍റിലേറ്ററുകളും പീഡിയാട്രിക് ഐ.സി.യുകളും ആംബുലന്‍സുകളും ഉള്‍പ്പെടെ സംവിധാനങ്ങള്‍ വര്‍ധിപ്പിക്കണം. രോഗബാധിതരായ കുട്ടികളോടൊപ്പം രക്ഷാകര്‍ത്താക്കള്‍ക്ക് കഴിയാന്‍ സംവിധാനമുള്ള കോവിഡ് വാര്‍ഡുകള്‍ സജ്ജമാക്കണം. അനാരോഗ്യവും വൈകല്യങ്ങളുമുള്ള കുട്ടികള്‍ക്ക് മുന്‍ഗണനാടിസ്ഥാനത്തില്‍ വാക്‌സിന്‍ നല്‍കണം.
കുട്ടികളിലെ മാനസിക പ്രശ്നങ്ങള്‍ പരിഹരിക്കാന്‍ സൗകര്യമൊരുക്കണമെന്നും കോവിഡ് സംരക്ഷണ നടപടികളില്‍ പെണ്‍കുട്ടികള്‍ക്കും സ്ത്രീകള്‍ക്കും വിവേചനം ഉണ്ടാകരുതെന്നും സമിതി ആവശ്യപ്പെട്ടു. 2015 ലെ പാര്‍ലമെന്‍ററി സ്റ്റാന്‍ഡിങ് കമ്മിറ്റി കണ്ടെത്തല്‍ പ്രകാരം രാജ്യത്തെ 82 ശതമാനം പ്രാഥമിക ആരോഗ്യ കേന്ദ്രങ്ങളിലും കുട്ടികള്‍ക്കുള്ള ഡോക്ടര്‍മാരുടെ കുറവുള്ളതും റിപ്പോര്‍ട്ടില്‍ ചൂണ്ടിക്കാട്ടി.
Post Your Comments