മുംബൈ: ഇനി ഏതുതരം പെട്രോൾ, ഡീസൽ വാഹനങ്ങളും കുറഞ്ഞ ചിലവിൽ ഇലട്രിക് ആക്കാം. പുണെ ആസ്ഥാനമായി പ്രവർത്തിക്കുന്ന നോർത്ത് വേ മോട്ടോർസ്പോർട്ട് പുറത്തിറക്കുന്ന ഇ.വി കിറ്റുകൾ ഉപയോഗിച്ചാണ് ഇത് സാധ്യമാകുന്നത്. ഇലക്ട്രിക് കൺവേർഷൻ കിറ്റിന്റെ ഏകദേശ വില ആറ് ലക്ഷം രൂപയാണ്.
കാറുകൾ, കാരിയേജ് വാഹനങ്ങൾ തുടങ്ങിയവക്കെല്ലാം ഇ.വി കിറ്റുകൾ നോർത്ത് വേ നിർമിക്കുന്നുണ്ട്. ഇവ റോഡ് നിയമങ്ങൾക്ക് വിധേയവും മാറ്റംവരുത്തിയ വാഹനത്തിന്റെ ആർസിക്ക് ആർടിഒയിൽ നിന്ന് അംഗീകാരം ലഭിക്കുന്നതുമാണ്. നോർത്ത് വേയുടെ സെഡാനുകൾക്കുള്ള കിറ്റ് നിലവിൽ ഇന്ത്യൻ വിപണിയിൽ ലഭ്യമായ മിക്ക സെഡാനുകളിലും ഇൻസ്റ്റാൾ ചെയ്യാൻ കഴിയുന്ന പ്ലഗ് ആൻഡ് പ്ലേ കിറ്റാണ്.
സെഡാനുകൾക്കായി രണ്ട് തരം കിറ്റുകൾ ലഭ്യമാണ്. ഒറ്റ ചാർജിൽ 120 കിലോമീറ്റർ റേഞ്ച് ലഭിക്കുന്ന ആദ്യ കിറ്റിൽ സാധാരണ സോക്കറ്റിലൂടെ ചാർജ് ചെയ്യാൻ അഞ്ച് മുതൽ ആറ് മണിക്കൂർ വേണ്ടിവരും. രണ്ടാമത്തെ കിറ്റിൽ വലിയ ബാറ്ററി പായ്ക്ക് ഉപയോഗിക്കുന്നതിനാൽ ഫുൾ ചാർജിൽ 250 കിലോമീറ്റർ വരെ പോകാനാകും. എന്നാൽ വാഹനം പൂർണ്ണമായി ചാർജ് ചെയ്യാൻ ഏകദേശം 8-10 മണിക്കൂർ വേണ്ടിവരും.
സ്റ്റാൻഡേർഡ് ഹാച്ച്ബാക്കുകളെ ഇലക്ട്രിക് വാഹനങ്ങളാക്കി മാറ്റാൻ ഉപയോഗിക്കാവുന്ന ഒരു കോംപാക്ട് സീരീസും കമ്പനി പുറത്തിറക്കുന്നുണ്ട്. ഈ കിറ്റ് നിലവിൽ പോളോ, ബീറ്റ്, സ്വിഫ്റ്റ് എന്നിവയിൽ ഉപയോഗിക്കാൻ സാധിക്കും. ഫുൾ ചാർജിൽ ഇവയ്ക്ക് 120 കിലോമീറ്റർ റേഞ്ച് ലഭിക്കും. പൂർണ ചാർജിൽ 500 കിലോമീറ്റർ റേഞ്ച് തരാൻ കഴിയുന്ന മറ്റൊരു കിറ്റിന്റെ പരീക്ഷണത്തിലാണ് കമ്പനി. ഇവ എർട്ടിഗ പോലെയുള്ള സേവന സീറ്ററുകളിൽ ഉപയോഗിക്കാൻ സാധിക്കും.
Post Your Comments