തിരുവനന്തപുരം: സ്വർണക്കടത്ത് കേസിലെ പ്രതി സരിത്തിനു തിരുവനന്തപുരം സെൻട്രൽ ജയിലിൽ ഭീഷണിയുണ്ടെന്ന പരാതിയിൽ അന്വേഷണം ആരംഭിച്ച് ആഭ്യന്തരവകുപ്പ്. ആഭ്യന്തര വകുപ്പ് ജോയിന്റ് സെക്രട്ടറി ആർ.സുഭാഷിന്റെ മേൽനോട്ടത്തിലാണ് അന്വേഷണം നടക്കുന്നത്. സരിത്തിന്റെ പരാതിയിൽ കഴമ്പുണ്ടോയെന്നും ഉദ്യോഗസ്ഥരെ കുടുക്കാനുള്ള ആസൂത്രിത ശ്രമമാണോ നടക്കുന്നതെന്നുമുള്ള കാര്യങ്ങളാണ് അന്വേഷിക്കുന്നത്.
സംഭവവുമായി ബന്ധപ്പെട്ട് ജയിൽ ഡിജിപി ഋഷിരാജ് സിങ് റിപ്പോർട്ട് സമർപ്പിച്ചിരുന്നു. എന്നാൽ കൂടുതൽ പരിശോധന ആവശ്യമായ സാഹചര്യം ഉണ്ടായതോടെയാണ് ആഭ്യന്തര സെക്രട്ടറി ടി.കെ.ജോസ് അന്വേഷണത്തിനു നിർദേശം നൽകിയത്. ഒരു മാസത്തിനകം റിപ്പോർട്ട് സമർപ്പിക്കണമെന്നാണ് നിർദ്ദേശം. സംശയകരമായ ഇടപാടുകൾ നടത്തിയതിനെത്തുടർന്ന് സ്ഥലംമാറ്റിയ ജയിൽ ജീവനക്കാരൻ ബോസിന്റെ പങ്കിനെ കുറിച്ചും അന്വേഷണം നടത്തും.
ജയിലിനുള്ളിൽ തനിക്കു ഭീഷണിയുണ്ടെന്നു കാട്ടി എറണാകുളം അഡീ.ചീഫ് ജുഡീഷ്യൽ മജിസ്‌ട്രേറ്റ് കോടതിയിൽ സരിത് പരാതി നൽകിയിരുന്നു. തുടർന്ന് ദക്ഷിണ മേഖല ഡിഐജി ജയിലിലെത്തി പരിശോധന നടത്തിയിരുന്നു. എന്നാൽ സരിത് അന്വേഷണത്തോട് സഹകരിക്കാൻ തയാറാകാതെ സ്വർണക്കടത്തു കേസിൽ മൊഴി മാറ്റി പറയാൻ ഉദ്യോഗസ്ഥർ ഭീഷണിപ്പെടുത്തുന്നതായി ആരോപണം ഉന്നയിക്കുകയായിരുന്നു.
Post Your Comments