തിരുവനന്തപുരം: ട്രാന്‍സ്‌ജെന്‍റര്‍ ആക്ടിവിസ്റ്റ് അനന്യ കുമാരിയുടെ മരണത്തില്‍ സംസ്ഥാന യുവജന കമ്മീഷന്‍ സ്വമേധയാ കേസെടുത്തു. ലിംഗമാറ്റ ശസ്ത്രക്രിയക്ക് വിധേയയായതിനെ തുടര്‍ന്ന് ഗുരുതരമായ ആരോഗ്യപ്രശ്‌നങ്ങള്‍ തനിക്ക് നേരിടേണ്ടി വന്നതായി നേരത്തെ അനന്യ പറഞ്ഞിരുന്നു. കൊച്ചിയിലെ ഒരു സ്വകാര്യ ആശുപത്രിയിലാണ് അനന്യ ലിംഗമാറ്റ ശസ്ത്രക്രിയക്ക് വിധേയയായത്. സംഭവവുമായി ബന്ധപ്പെട്ട് അടിയന്തരമായി സമഗ്രമായ റിപ്പോര്‍ട്ട് നല്‍കാനും ജില്ലാ പോലീസ് മേധാവിയോട് യുവജന കമ്മീഷന്‍ ആവശ്യപ്പെട്ടു.
ലിംഗ മാറ്റ ശസ്ത്രക്രിയയുടെ പേരില്‍ ചില സ്വകാര്യ ആശുപത്രികള്‍ ആളുകളെ കടുത്ത ചൂഷണത്തിന് വിധേയമാക്കുന്നതായി ആക്ഷേപം ഉയര്‍ന്നിട്ടുണ്ടെന്നും ഇത് പരിശോധിക്കപ്പെടേണ്ടതാണെന്നും യുവജന കമ്മീഷന്‍ അധ്യക്ഷ ചിന്താ ജെറോം വ്യക്തമാക്കി. അനന്യകുമാരിയുടെ മരണത്തിലേക്ക് നയിച്ച കാരണങ്ങള്‍ സമഗ്രമായ പരിശോധനക്ക് വിധേയമാക്കി ഉത്തരവാദികളെ നിയമത്തിന്‍റെ മുന്നില്‍ കൊണ്ടു വരണമെന്നും ചിന്താ ജെറോം ആവശ്യപ്പെട്ടിട്ടു.
Post Your Comments