അഞ്ചല്‍: ഇടമുളയ്ക്കല്‍ ഷാന്‍ മന്‍സിലില്‍ കൂടെ താമസിച്ചിരുന്ന യുവാവ് തീവെച്ചു കൊന്ന ആതിര(28)യുടെയും തീ വെച്ചപ്പോൾ പൊള്ളലേറ്റു ചികിത്സയിലുള്ള ഷാനവാസിന്റെയും മൂന്ന് മാസം പ്രായമുള്ള പെണ്‍കുഞ്ഞിനെ ജില്ല ശിശുക്ഷേമ സമിതി ഏറ്റെടുത്തു. ഷാനവാസിന്റെ രക്ഷാകര്‍ത്താക്കളില്‍ നിന്നാണ് കുട്ടിയെ അധികൃതര്‍ ഏറ്റെടുത്തത്.
മാതാവ് കൊല്ലപ്പെടുകയും പിതാവ് പൊലീസ് കസ്റ്റഡിയിലാവുകയും ചെയ്ത വിവരം അന്വേഷണസംഘം ജില്ല ശിശുക്ഷേമ സമിതി അധികൃതരെ അറിയിച്ചതിനെത്തുടര്‍ന്നാണ് നടപടി. തിരുവനന്തപുരം മെഡിക്കല്‍ കോളജ് ആശുപത്രിയില്‍ ചികിത്സയില്‍ കഴിയുന്ന ഷാനവാസിനെ അപകടനില തരണം ചെയ്തതിനെത്തുടര്‍ന്ന് അറസ്റ്റ് രേഖപ്പെടുത്തി പൊലീസ് സെല്ലിലേക്ക് മാറ്റി. ആതിരയുടെ മാതാവ് അമ്പിളിയുടെ പരാതിയുടെ അടിസ്ഥാനത്തില്‍ ഷാനവാസിനെതിരെ കൊലക്കുറ്റത്തിന് കേസെടുത്തിട്ടുണ്ട്.
കൊല്ലം ജില്ല ശിശുക്ഷേമ സമിതി വൈസ് ചെയര്‍മാന്‍ ഷൈന്‍ ദേവ്, അഞ്ചല്‍ പൊലീസ് സ്റ്റേഷനിലെ എസ്.ഐ അലക്സാണ്ടര്‍ എന്നിവരുടെ നേതൃത്വത്തിലാണ് കുഞ്ഞിനെ ഏറ്റെടുത്തത്. പുനലൂര്‍ ഡിവൈ.എസ്.പി എം.എസ്. സന്തോഷിനാണ് അന്വേഷണച്ചുമതല. ഷാനവാസിന് ആദ്യ വിവാഹത്തില്‍ എട്ട് വയസ്സുള്ള മകനും നാല് വയസ്സുള്ള മകളുമുണ്ട്. മകന്‍ ഷാനവാസിന്റെ പിതാവിന്റെ സംരക്ഷണത്തിലും മകള്‍ ഷാനവാസിന്റെ ആദ്യ ഭാര്യയുടെ മാതാവിന്റെ സംരക്ഷണയിലുമാണ്.
Post Your Comments