ന്യൂഡൽഹി : “കോവിഡ് പശ്ചാത്തലത്തില്‍ ലോകാരോഗ്യ സംഘടന രൂപം നല്‍കിയ ദുരിതാശ്വാസ പദ്ധതിയാണിത്. അതിന്‍റെ ഭാഗമായി ദിവസവും തെരഞ്ഞെടുത്ത പതിനായിരം പേര്‍ക്ക് അരലക്ഷം രൂപ മുതല്‍ ഒരു ലക്ഷം രൂപ വരെയാണ് കോവിഡ് വാക്സിന് സബ്സിഡിയായി നല്‍കുന്നത്. താഴെ തന്ന ലിങ്കില്‍ ക്ലിക്ക് ചെയ്യുക.” വൈറലാകുന്ന ഈ മെസ്സേജിന് പിന്നിലെ സത്യാവസ്ഥ പുറത്ത്.
”ലോകാരോഗ്യ സംഘടനയല്ലേ, അവര്‍ ഇങ്ങനെ പറ്റിക്കുകയൊക്കെ ചെയ്യുമോ? അതും ഈ മഹാമാരിക്കാലത്ത്…” എന്നൊക്കെ ചിന്തിച്ച്‌ ക്ലിക്ക് ചെയ്യുന്നവരാകും അധികവും. പാതിവിലക്ക് ഹെഡ് സെറ്റ് വില്‍പനക്ക് എന്ന് പറഞ്ഞ് ഉഡായിപ്പ് വെബ്സൈറ്റില്‍ ഒരു പരസ്യം കണ്ടമാത്രയില്‍ പോയി തലവെച്ച്‌ കൊടുത്ത് കാശ് കളഞ്ഞ ഉന്നത പൊലീസുദ്യോഗസ്ഥര്‍ വരെയുള്ള നാടാണിത്. അപ്പോള്‍, ഒരുലക്ഷം സബ്സിഡിയെന്നു കേട്ടാല്‍ നമ്മളെ പോലുള്ള സാധാരണക്കാരൊക്കെ എപ്പോള്‍ ചെന്നു ക്യൂ നിന്നു എന്ന് ചോദിച്ചാല്‍ മതി.
എന്നാല്‍ ഇത് സംഗതി വ്യാജമാണെന്നാണ് കേന്ദ്ര സര്‍ക്കാര്‍ ഏജന്‍സികള്‍ തരുന്ന മുന്നറിയിപ്പ്. അങ്ങനൊരു സബ്സിഡി ഡബ്ല്യു.എച്ച്‌.ഒ ഏര്‍പ്പെടുത്തിയിട്ടേ ഇല്ലത്രെ. ബാങ്കിങ് പാസ്വേഡ് അടക്കമുള്ള വ്യക്തിഗത വിവരങ്ങള്‍ ചോര്‍ത്തി വഞ്ചിക്കാനുള്ള ഏതോ കുബുദ്ധികളാണ് ഈ തട്ടിപ്പിനുപിന്നില്‍ എന്നാണ് കേന്ദ്ര സര്‍ക്കാറിന്‍റെ പ്രസ് ഇന്‍ഫര്‍മേഷന്‍ ബ്യൂറോ (പി.ഐ.ബി) നല്‍കുന്ന വിവരം. ലോട്ടറി അടിച്ചെന്നും സമ്മാനം നല്‍കുമെന്നും പറഞ്ഞ് വരുന്ന മെസേജുകളില്‍ ഉള്ള ഇത്തരം വെബ് സൈറ്റ് അഡ്രസുകളില്‍ ക്ലിക്കുചെയ്യുന്നത് ഒഴിവാക്കണമെന്നും പി.ഐ.ബി ആവശ്യപ്പെടുന്നു.
Post Your Comments