തട്ടിക്കൊണ്ടുപോയി ഭാര്യയെ ഉപദ്രവിച്ച സംഭവം; ഇന്ത്യന്‍ യുവാവിന് ശിക്ഷ വിധിച്ച് കോടതി

വാഷിങ്ടണ്‍: ഭാര്യയെ ഉപദ്രവിക്കുകയും തട്ടിക്കൊണ്ടുപോകുകയും ചെയ്ത സംഭവത്തില്‍ ഇന്ത്യന്‍ യുവാവിന് അമേരിക്കയില്‍ 56 മാസം ജയില്‍ ശിക്ഷ വിധിച്ച് കോടതി. മൂന്ന് വര്‍ഷം നല്ലനടപ്പിനും കോടതി വിധിച്ചിരിക്കുകയാണ്. ശിക്ഷാകാലാവധിക്ക് ശേഷം ഇയാളെ ഇന്ത്യയിലേക്ക് നാടുകടത്തുന്നതാണ്. കഴിഞ്ഞ നവംബറിലാണ് സുനില്‍ കെ അഗുള എന്ന 32 കാരന്‍ ഭാര്യയെ ഉപദ്രവിച്ച സംഭവത്തിൽ കുറ്റക്കാരനാണെന്ന് കോടതി കണ്ടെത്തുകയുണ്ടായത്. 2019ലാണ് സംഭവം ഉണ്ടായിരിക്കുന്നത്.

സുനില്‍ ഭാര്യയെ അപാര്‍ട്ട്‌മെന്റ് വിട്ടിറങ്ങാന്‍ ബലം പ്രയോഗിച്ചെന്നും കാറില്‍ ബലപ്രയോഗിച്ച് കയറ്റി മര്‍ദ്ദിച്ചെന്നുമാണ് കേസ്. ജോലി രാജിവെക്കാന്‍ രാജിക്കത്ത് ബലം പ്രയോഗിച്ച് തൊഴിലുടമക്ക് ഇ മെയില്‍ ചെയ്യിപ്പിക്കുകയുണ്ടായി. ഭാര്യയുടെ ലാപ്‌ടോപ് തല്ലിപ്പൊട്ടിച്ച് വലിച്ചെറിഞ്ഞു. പിന്നീടും ഭാര്യയെ മര്‍ദ്ദിച്ചു. ലോക്കല്‍ പൊലീസാണ് സുനിലിനെ അറസ്റ്റ് ചെയ്തത്. കസ്റ്റഡിയില്‍ കഴിയവെ ഭാര്യയുടെ മൊഴി മാറ്റാനായി ഇന്ത്യയിലുള്ള ഭാര്യയുടെ പിതാവിനോട് ഫോണില്‍ നിര്‍ബന്ധിച്ചെന്നും പ്രൊസിക്യൂഷന്‍ പറയുന്നു.