സൗദിയിൽ ഇന്ന് കോവിഡ് ബാധിച്ചത് 590 പേർക്ക്

ജിദ്ദ: സൗദിയിൽ ദിനംപ്രതി റിപ്പോർട്ട് ചെയ്യുന്ന കോവിഡ് രോഗികളുടെ എണ്ണം 600 നോടടുക്കുന്നു. വ്യാഴാഴ്ച 590 പുതിയ കോവിഡ് കേസുകൾ റിപ്പോർട്ട് ചെയ്തിരിക്കുന്നു. 386 പേർ രോഗമുക്തി നേടിയിരിക്കുന്നു. ഇതോടെ രാജ്യത്ത് കൊറോണ വൈറസ് രോഗം സ്ഥിരീകരിച്ചവരുടെ ആകെ എണ്ണം 3,90,597 ആയി ഉയർന്നു. ഇവരിൽ 3,78,469 പേർക്കും രോഗം ഭേദമായി.

കോവിഡ് ചികിത്സയിലുണ്ടായിരുന്നവരിൽ ഏഴ്‌ പേർ കൂടി മരിച്ചു. ഇതോടെ ആകെ മരണസംഖ്യ 6,676 ആയി ഉയർന്നിരിക്കുന്നു. രാജ്യത്തെ വിവിധ ആശുപത്രികളിലും മറ്റുമായി ചികിത്സയിലുള്ളവരുടെ എണ്ണം 5,452 ആയി ഉയർന്നു. ഇവരിൽ 699 പേരുടെ നില അതീവ ഗുരുതരമാണ്. ചികിത്സയിൽ കഴിയുന്ന ബാക്കിയുള്ളവരുടെ ആരോഗ്യനില തൃപ്തികരമാണ്. രാജ്യത്തെ കോവിഡ് മുക്തി നിരക്ക് 97 ശതമാനവും മരണനിരക്ക് 1.8 ശതമാനവുമാണ്.

സൗദിയിൽ ഏറ്റവും കൂടുതൽ രോഗികൾ വർധിക്കുന്ന റിയാദ് പ്രവിശ്യയിൽ 238 പുതിയ കേസുകളാണ് കണ്ടെത്തിയത്. ജിദ്ദ ഉൾപ്പെടുന്ന മക്ക പ്രവിശ്യയിലും രോഗികളുടെ എണ്ണം വർധിക്കുന്നുണ്ട്. വിവിധ മേഖലകളിൽ റിപ്പോർട്ട് ചെയ്ത പുതിയ കോവിഡ് കേസുകൾ: റിയാദ് 238, മക്ക 111, കിഴക്കൻ പ്രവിശ്യ 84, മദീന 34, വടക്കൻ അതിർത്തി മേഖല 30, ഹാഇൽ 22, അൽ ഖസീം 18, അസീർ 17, തബൂക്ക് 12, ജീസാൻ 10, നജ്റാൻ 7, അൽജൗഫ് 4, അൽബാഹ 3.