പ്രീമിയർ ലീഗിൽ ആസ്റ്റൺ വില്ല ന്യൂകാസിൽ യുണൈറ്റഡ് മത്സരം സമനിലയിൽ

ഇംഗ്ലീഷ് പ്രീമിയർ ലീഗിൽ ആസ്റ്റൺ വില്ല ന്യൂകാസിൽ യുണൈറ്റഡ് മത്സരം സമനിലയിൽ. മത്സരത്തിന്റെ അവസാനം വരെ ഒരു ഗോളിന്റെ ലീഡിൽ നിന്ന ആസ്റ്റൺ വില്ല അവസാന നിമിഷമാണ് സമനില വഴങ്ങിയത്. ഇരുടീമുകളും അവസരങ്ങൾ സൃഷ്ടിച്ചിരുന്നുണെങ്കിലും 86 -ാം മിനുട്ടിൽ കളിയിലെ ആദ്യ ഗോൾ പിറന്നു. വാറ്റ്കിൻസിന്റെ ഹെഡർ ന്യൂകാസിലിന്റെ വലയിൽ കയറുകയായിരുന്നു. മറുപടി ഗോളിനായി കിണഞ്ഞു ശ്രമിച്ച ന്യൂകാസിൽ എക്സ്ട്രാ ടൈമിൽ (90+4) ലഭിച്ച കോർണറിൽ നിന്ന് ഹെഡറിലൂടെ ജമാൽ ലസെൽസ് ആസ്റ്റൺ വില്ലയുടെ നെഞ്ചുതുളച്ച് ഗോൾ തിരിച്ചടിച്ചു.

അവസാന അഞ്ചു ലീഗ് മത്സരങ്ങൾ കളിച്ച ആസ്റ്റൺ വില്ലയ്ക്ക് 5 പോയിന്റ് മാത്രമാണ് നേടാനായത്. 27 മത്സരങ്ങളിൽ നിന്ന് 41 പോയിന്റുമായി ആസ്റ്റൺ വില്ല ലീഗിൽ ഒമ്പതാം സ്ഥാനത്താണ്. 28 മത്സരങ്ങളിൽ നിന്ന് 28 പോയിന്റുമായി ന്യൂകാസിൽ യുണൈറ്റഡ് 16 -ാം സ്ഥാനത്താണ്. അതേസമയം, ആസ്റ്റൺ വില്ല മിഡ്ഫീൽഡർ ജാക്ക് ഗ്രീലിഷ് പരിക്ക് മാറി തിരികെ ടീമിലെത്തുന്നത് വൈകുമെന്ന് പരിശീലകൻ ഡീൻ സ്മിത്ത് പറഞ്ഞു. കാലിനേറ്റ പരിക്ക് കാരണം അവസാന നാലു മത്സരങ്ങളിൽ ഗ്രീലിഷ് ആസ്റ്റൺ വില്ല നിരയിൽ കളിച്ചിരുന്നില്ല. ആ അഞ്ച് മത്സരങ്ങളിലും ടീമിന് അവരുടെ താളം കണ്ടെത്താനായില്ല.