യുവതിയെ തട്ടിക്കൊണ്ടു പോയ സംഭവം: സംഘത്തലവൻ പോലീസ് കസ്റ്റഡിയിൽ

മാന്നാർ; ദുബായിൽ നിന്നു മാന്നാറിലെത്തിയ യുവതിയെ തട്ടിക്കൊണ്ടു പോയതിന് റിമാൻഡിൽ കഴിഞ്ഞ ക്വട്ടേഷൻ സംഘ തലവൻ മാന്നാർ കുരട്ടിശേരി പുത്തൻപുരയിൽ ഷംസിനെ (42) രണ്ടു ദിവസത്തേക്കു പൊലീസ് കസ്റ്റഡിയിൽ വിട്ടിരിക്കുന്നു. മാന്നാർ കരുട്ടിക്കാട് വിസ്മയ വിലാസത്തി‍ൽ ബിന്ദുവിനെ (39) തട്ടിക്കൊണ്ടു പോകാൻ സഹായം ചെയ്ത ക്വട്ടേഷൻ സംഘത്തലവനായ ഷംസിനെ കഴിഞ്ഞ വെള്ളിയാഴ്ച ചങ്ങനാശേരിയിൽ നിന്നാണ് പോലീസ് അറസ്റ്റ് ചെയ്തിരിക്കുന്നത്. ഷംസിന്റെ കൂട്ടാളി മാന്നാർ കുരുട്ടിശേരി റാണി പറമ്പിൽ പീറ്റർ ജേക്കബിനെ (34) ആണ് മാന്നാർ പൊലീസ് ആദ്യം അറസ്റ്റ് ചെയ്തത്.

പിന്നീട് എറണാകുളം പറവൂർ സ്വദേശി അൻഷാദ് (36), പൊന്നാനി ആനയടി സ്വദേശി അബ്ദുൽ ഫഹദ് (35), തിരുവല്ല സ്വദേശി ബിനോ വർഗീസ് (39), പരുമല തിക്കപ്പുഴ സ്വദേശി ശിവപ്രസാദ് ( കുട്ടപ്പായി– 37), പരുമല സ്വദേശി സുബിൻ(കൊച്ചുമോൻ– 36) എന്നിവരും അറസ്റ്റിലായി. അഞ്ചുപേരെ ഇനിയും പിടിക്കാനുണ്ട്. അക്രമിസംഘത്തിന്റെ മർദനത്തിൽ നട്ടെല്ലിനു ഗുരുതരമായി പരുക്കേറ്റു പരുമലയിലെ സ്വകാര്യ ആശുപത്രിയിൽ ചികിത്സയിൽ കഴിഞ്ഞ ബിന്ദു ആശുപത്രി വിട്ടു.