കോഴിക്കോട്: ജോലി വാഗ്ദാനവുമായി വരുന്നവരെ കരുതിയിരിക്കണമെന്ന് മില്‍മ. മില്‍മയില്‍ ജോലി തരപ്പെടുത്തിത്തരാമെന്ന വ്യാജേന സാമൂഹ്യ വിരുദ്ധര്‍ പലതരം തട്ടിപ്പുകള്‍ ചെയ്യുന്നത് ശ്രദ്ധയില്‍ പ്പെട്ടിട്ടുണ്ടെന്നും അത്തരക്കാരുടെ ഇടപെടലില്‍ വഞ്ചിതരാകരുതെന്നും മില്‍മ മില്‍മ മലബാര്‍ മേഖലാ യൂണിയന്‍ അറിയിച്ചു.ജോലി വാഗ്ദാനവുമായി ബന്ധപ്പെട്ട് സാമൂഹിക വിരുദ്ധരുടെ എന്തെങ്കിലും വിധത്തിലുളള സന്ദേശം ലഭിച്ചാല്‍ ഉടനടി അറിയിക്കണമെന്നും എന്നാൽ നിയമാനുസൃതമായ നടപടികള്‍ പൂര്‍ത്തിയാക്കി മാത്രമേ മലബാര്‍ മേഖലാ യൂണിയന്‍ നിയമന കാര്യത്തില്‍ സ്വീകരിക്കുകയുളളുവെന്നും മലബാര്‍ മേഖലാ യൂണിയന്‍ മനേജിംഗ് ഡയറക്ടര്‍ കെ.എം. വിജയകുമാന്‍ വ്യക്തമാക്കി. മലബാര്‍ മേഖലാ യൂണിയന്‍ നേരിട്ട് ഒരു തസ്തികയിലേക്കും സ്ഥിര നിയമനത്തിനായി നടപടി ക്രമങ്ങള്‍ നടത്തുന്നില്ലെന്നും അദ്ദേഹം പറഞ്ഞു.
പാലക്കാട്, കോഴിക്കോട്, കണ്ണൂര്‍, കാസര്‍ഗോഡ്, മലപ്പുറം, വയനാട് ജില്ലകളില്‍ സ്ഥിതി ചെയ്യുന്ന ഡെയറി പ്ലാന്‍റുകളിലേക്കും, അനുബന്ധ സ്ഥാപനങ്ങളിലേക്കും സ്ഥിര നിയമനങ്ങള്‍ നടത്തുന്നത് മൃഗസംരക്ഷണ -ക്ഷീരവികസന വകുപ്പ് സെക്രട്ടറി ചെയര്‍മാനായും കേരള കോ-ഓപ്പറേറ്റീവ് മില്‍ക്ക് മാര്‍ക്കറ്റിങ് ഫെഡറേഷന്‍ മാനേജിംഗ് ഡയറക്ടര്‍ കണ്‍വീനറുമായുളള കമ്മറ്റിയാണ്. ഉദ്യോഗാര്‍ത്ഥികള്‍ക്കുളള എഴുത്ത് പരീക്ഷയും കൂടിക്കാഴ്ച്ചയും മറ്റും നടത്തി റാങ്ക് ലിസ്റ്റ് തയ്യാറാക്കുന്നതിന് ഈ കമ്മിറ്റിയെയാണ് മലബാര്‍ മേഖലാ യൂണിയന്‍ ചുമതലപ്പെടുത്തിയിട്ടുളളത്.
Post Your Comments