റോഡുകള്‍ ആസിഡ് ഒഴിച്ച് നശിപ്പിക്കുന്നു, ജനങ്ങളുടെ സഹകരണത്തോടുകൂടി പ്രതിരോധിക്കുമെന്ന് എം.എൽ.എ മുഹമ്മദ് മുഹസിൻ

പാലക്കാട് : ആസിഡ് ഒഴിച്ച് റോഡുകൾ തകർക്കാൻ ചില ശക്തികൾ ശ്രമിക്കുന്നതായും ഇത് ബോധപൂര്‍വ്വമുള്ള ചിലരുടെ നീക്കമാണെന്നും ആരോപിച്ച് പട്ടാമ്പി എംഎൽഎ മുഹമ്മദ് മുഹ്‌സിൻ.  ഓങ്ങല്ലൂർ-കാരക്കാട്-വാടാനാംകുറുശ്ശി റോഡിലാണ് നിരന്തരമായി ആസിഡ് ഒഴിക്കുന്നത്. സംഭവം പൊലീസിനെ അറിയിച്ചതായും കുറ്റക്കാര്‍ക്കെതിരെ കര്‍‌ശന നടപടി എടുക്കുമെന്നും എംഎല്‍എ വ്യക്തമാക്കി. ഫേസ്ബുക്കിൽ പങ്കുവെച്ച കുറിപ്പിലൂടെയാണ് എംഎൽഎ ഈ കാര്യം പറയുന്നത്. ഒപ്പം
ആസിഡൊഴിച്ച് നശിപ്പിച്ച റോഡിന്‍റെ ചിത്രങ്ങളും എംഎല്‍എ പങ്ക് വച്ചു.

കുറിപ്പിന്റെ പൂർണരൂപം……………………………..

#റോഡിൽ_ആസിഡ്_ഒഴിച്ചത്_ദൗർഭാഗ്യകരം

ഓങ്ങല്ലൂർ-കാരക്കാട്-വാടാനാംകുറുശ്ശി റോഡിൽ നിരന്തരമായി ആസിഡ് ഒഴിക്കുന്നത് ശ്രദ്ധയിൽപ്പെട്ടു. ഇന്ന് പോലീസും പിഡബ്ല്യുഡിയും സംയുക്തമായി ഇൻസ്പെക്ഷൻ നടത്തി. റോഡ് തകർക്കാനുള്ള ബോധപൂർവമായ ഉദ്ദേശത്തോടെ നടത്തുന്ന ഇത്തരം പ്രവൃത്തികൾ വളരെ ദൗർഭാഗ്യകരമാണ്.

ഈ സർക്കാർ അധികാരത്തിൽ വരുന്നതിനു മുമ്പ് വളരെ ചെറുതും മോശവുമായ റോഡാണ് ഉണ്ടായിരുന്നത്. ഇടതുപക്ഷ സർക്കാർ അധികാരത്തിൽ വന്നതിനുശേഷം മികച്ച ബിഎം&ബിസി (റബറൈസ്ഡ് ) റോഡ് നിർമ്മിച്ചു ജനങ്ങൾക്കായി തുറന്നു കൊടുത്തു. ഈ റോഡ് ആസിഡൊഴിച്ചു മറ്റും തകർക്കാനുള്ള ശ്രമങ്ങൾ ജനങ്ങളുടെ സഹകരണത്തോടുകൂടി പ്രതിരോധിക്കും. ഇത്തരം പ്രവർത്തികൾ ആവർത്തിക്കുകയാണെങ്കിൽ അവർ കർശനമായ നിയമ നടപടി നേരിടേണ്ടിവരും.

മുഹമ്മദ് മുഹസിൻ എംഎൽഎ