ന്യൂഡൽഹി : സ്വിസ് ബാങ്കിൽ 196 കോടി രൂപയുടെ കള്ളപ്പണ നിക്ഷേപം കണ്ടെത്തിയ വൃദ്ധയിൽ നിന്ന് നികുതിയും പിഴയും ഈടാക്കാനൊരുങ്ങി ആദായ നികുതി വകുപ്പ്. അതേസമയം കള്ളപ്പണ നിക്ഷേപം കണ്ടെത്തിയതോടെ 14,000 രൂപ മാത്രമാണ് മാസവരുമാനമെന്നും നിക്ഷേപം തന്റേതല്ലെന്ന വാദവുമായി വൃദ്ധ രംഗത്തെത്തി. എന്നാൽ ഇവരുടെ വാദം ശരിയല്ലെന്ന് കണ്ടെത്തിയതോടെ 80കാരിയായ രേണു തരണിയിൽനിന്ന് പിഴ ഈടാക്കാൻ ഇൻകം ടാക്സ് അപ്പല്ലേറ്റ് ട്രൈബ്യൂനൽ (ഐ.ടി.എ.ടി) ഉത്തരവിടുകയായിരുന്നു.
2004ലാണ് സ്വിസ് ബാങ്കിൽ ഈ അക്കൗണ്ട് തുറന്നിരിക്കുന്നത്. തരണി കുടുംബ ട്രസ്റ്റിന്റെ പേരിലാണ് 196 കോടി രൂപയുടെ നിക്ഷേപം. 2005 -06 കാലയളവിൽ നിക്ഷേപവിവരം ആദായ നികുതി റിട്ടേണിൽ കാണിച്ചിട്ടില്ല. തുടർന്ന് 2014ൽ നിക്ഷേപം കണ്ടെത്തിയതോടെ വൃദ്ധക്കെതിരെ കേസെടുക്കുകയായിരുന്നു.
എന്നാൽ തനിക്ക് സ്വിസ് ബാങ്കിൽ നിക്ഷേപമില്ലെന്ന് വൃദ്ധ ആവർത്തിച്ചുകൊണ്ടിരിക്കുകയായിരുന്നു. ട്രസ്റ്റിലെ നിക്ഷേപത്തിൽ പങ്കില്ലെന്നും ഒരുഘട്ടത്തിൽ നിക്ഷേപകാലയളവിൽ നോൺ റെസിഡൻറാണെന്ന വാദം പോലും വൃദ്ധ ഉയർത്തി.
അതേസമയം 2005 -06 കാലയളവിൽ ആദായ നികുതി റിട്ടേണിൽ 1.7 ലക്ഷം വാർഷിക വരുമാനവും വിലാസം ബംഗളൂരു കാണിക്കുകയും ഇന്ത്യൻ നികുതി ദായകനെന്ന് അവകാശപ്പെട്ടതായും ആദായ നികുതി വകുപ്പ് ചൂണ്ടിക്കാട്ടി.
Post Your Comments