യുഎഇയില്‍ നിന്നും ആശ്വാസ വാര്‍ത്ത ; കോവിഡ് മുക്തരുടെ എണ്ണം ഏഴായിരത്തിനോടടുക്കുന്നു ; ലോക്ക്ഡൗണ്‍ നിയന്ത്രണങ്ങളില്‍ കൂടുതല്‍ ഇളവ്

യുഎഇ ഇന്ന് 352 പേര്‍ രോഗമുക്തരായതായി ആരോഗ്യ-പ്രതിരോധ മന്ത്രാലയം റിപ്പോര്‍ട്ട് ചെയ്തു. ഇതോടെ രാജ്യത്ത് കോവിഡ് മുക്തരാകുന്നവരുടെ എണ്ണം 49,269 ആയി ഉയര്‍ന്നു. അതേമയം ഇന്ന് 211 പുതിയ കേസുകളും ഒരു പുതിയ മരണവും റിപ്പോര്‍ട്ട് ചെയ്തു. ഇതോടെ രാജ്യത്ത് ആകെ കോവിഡ് ബാധിതരുടെ എണ്ണം 56,922 ആയി. മരണസംഖ്യ 339.

ഇന്ന് 47,000 പുതിയ കോവിഡ് -19 ടെസ്റ്റുകളും നടത്തിയിട്ടുണ്ട്. കൊറോണ വൈറസ് കേസുകള്‍ നേരത്തേ കണ്ടെത്തുന്നതിനും ആവശ്യമായ ചികിത്സ നടപ്പാക്കുന്നതിനും രാജ്യവ്യാപകമായി പരിശോധനയുടെ വ്യാപ്തി വിപുലീകരിക്കുകയെന്നതാണ് ലക്ഷ്യമെന്ന് മന്ത്രാലയം സ്ഥിരീകരിച്ചു. അതേസമയം നിയമലംഘകര്‍ കനത്ത പിഴയും ജയില്‍ ശിക്ഷയും നേരിടേണ്ടിവരുമെന്നും വ്യക്തികളും സമൂഹങ്ങളും കര്‍ശനമായ സുരക്ഷാ നടപടികള്‍ പാലിക്കേണ്ടതുണ്ടെന്നും അധികൃതര്‍ വ്യക്തമാക്കി.

അവസാന ഘട്ടം 3 മനുഷ്യ പരീക്ഷണങ്ങള്‍ ആരംഭിച്ചതോടെ കോവിഡ് -19 നെതിരെ വാക്സിന്‍ തേടാനുള്ള ശ്രമത്തില്‍ യുഎഇ മറ്റ് രാജ്യങ്ങളില്‍ നിന്നും ശ്രദ്ധ പിടിച്ചുപറ്റുകയാണ്. നിര്‍ജ്ജീവമാക്കിയ വാക്‌സിനുകളുടെ മൂന്നാം ഘട്ട ക്ലിനിക്കല്‍ പരീക്ഷണങ്ങള്‍ക്കായി സന്നദ്ധസേവനം നടത്താന്‍ ആഗ്രഹിക്കുന്ന യുഎഇയിലുടനീളമുള്ള പൗരന്മാര്‍ക്കും താമസക്കാര്‍ക്കും ഓപ്പണ്‍ രജിസ്‌ട്രേഷന്‍ ഏകോപനം നടക്കുന്നുണ്ട്. ക്ലിനിക്കല്‍ ട്രയല്‍ ഏകദേശം മൂന്ന് മുതല്‍ ആറ് മാസം വരെ നീണ്ടുനില്‍ക്കും. വാക്‌സിനുകളുടെ സുരക്ഷയും കാര്യക്ഷമതയും കൂടുതല്‍ പരിശോധിക്കുന്നതിനായി 15,000 സന്നദ്ധപ്രവര്‍ത്തകരില്‍ പരീക്ഷിക്കും.

കൊറോണ വൈറസ് വ്യാപനം നിയന്ത്രിക്കുന്നതിന്റെ ഭാഗമായി നേരത്തെ ഏര്‍പ്പെടുത്തിയിരുന്ന ലോക്ക്ഡൗണ്‍ നിയന്ത്രണങ്ങളില്‍ നിന്നും യുഎഇയിലെ മാളുകളിലെയും ഷോപ്പിംഗ് സെന്ററുകളിലെയും പ്രാര്‍ത്ഥന മുറികള്‍ ജൂലൈ 20 തിങ്കളാഴ്ച മുതല്‍ 30 ശതമാനം ശേഷിയില്‍ വീണ്ടും തുറക്കാന്‍ ഒരുങ്ങുകയാണ്. എല്ലാ കര്‍ശനമായ മുന്‍കരുതല്‍ നടപടികളും പിന്തുടര്‍ന്ന് എമിറേറ്റിലെ സാധാരണ ജീവിതത്തിലേക്ക് ക്രമേണ മടങ്ങിവരാനുള്ള സമഗ്ര പദ്ധതിയുടെ ഭാഗമായി ഷാര്‍ജയില്‍ മുഴുവന്‍ സര്‍ക്കാര്‍ ജീവനക്കാരും ഇന്ന് മുതല്‍ ജോലിയില്‍ പ്രവേശിച്ചു.