മലപ്പുറം : ആളുമാറി യുവാവിനെ തട്ടിക്കൊണ്ടുപോയി മർദിച്ച് പണവും ബൈക്കും മോഷ്ടിച്ച കേസിൽ ആറുപേരെ മലപ്പുറം പോലീസ് പിടികൂടി. മരമില്ലിന്റെ ചില്ല് പൊട്ടിച്ചെന്നാരോപിച്ചാണ് യുവാവിനെ ആറംഗ സംഘം തട്ടിക്കൊണ്ടുപോയത്. മലപ്പുറം ഊരകം സ്വദേശികളായ ഇസ്ഹാക്ക്, മുഹമ്മദ് റിയാസ്, മുഹമ്മദ് ഇഷാം, ഷംസുദ്ദീന്‍,കോട്ടുമല സ്വദേശികളായ മുജീബ് റഹ്മാന്‍,സൈനുദ്ദീന്‍ എന്നിവരാണ് അറസ്റ്റിലായത്.
ഈ മാസം പതിനൊന്നിനാണ് പട്ടര്‍ക്കടവ് സ്വദേശി തൈക്കണ്ടി അബ്ദുള്‍ നാസറിനെ സംഘം തട്ടിക്കൊണ്ടുപോയത്. അങ്ങാടിയില്‍ നിന്നിരുന്ന അബ്ദുള്‍ നാസറിനെ ഒരു കാര്യം പറയാനുണ്ടെന്ന് പറഞ്ഞ് ഓട്ടോറിക്ഷയില്‍ കയറ്റി കൊണ്ടുപോകുകയായിരുന്നു.
പ്രതികളിലൊരാളായ ഇസ്ഹാഖിന്റെ ഉടമസ്ഥതയിലുള്ള വേങ്ങര വെങ്കുളത്തെ മരമില്ലിന്റെ ചില്ല് തകര്‍ത്തത് അബ്ദുള്‍ നാസറാണെന്ന ധാരണയിലാണ് അദ്ദേഹത്തെ തട്ടിക്കൊണ്ടുപോയതെന്ന് പൊലീസ് പറഞ്ഞു.കോട്ടുമലയിലുള്ള ഒരു ക്ലബ്ബിൽ ഉച്ചവരെ പൂട്ടിയിട്ടായിരുന്നു മർദനം. തുടർന്ന് പണവും പട്ടർക്കടവിൽനിന്ന് ബൈക്കും സംഘം മോഷ്ടിച്ചു.
കൂട്ടായ കവർച്ച, തട്ടിക്കൊണ്ടുപോകൽ എന്നീ വകുപ്പുകൾ പ്രകാരമാണ് കേസ്. പ്രതികളെ പരപ്പനങ്ങാടി മജിസ്‌ട്രേറ്റിനുമുന്നിൽ ഹാജരാക്കി. സി.പി.ഒമാരായ ഹരിലാൽ, ആർ. സഹേഷ് എന്നിവരായിരുന്നു അന്വേഷണസംഘത്തിൽ.
Post Your Comments