കേരളത്തില്‍ ഇന്ന് മൂന്ന് ജില്ലകള്‍ കൂടി കോവിഡ് – 19 മുക്തമായി

തിരുവനന്തപുരം • സംസ്ഥാനത്ത് ഇന്ന് മൂന്ന് ജില്ലകള്‍ കൂടി കോവിഡ് 19 മുക്തമായി. തിരുവനന്തപുരം, മലപ്പുറം, കോഴിക്കോട് ജില്ലകളിലാണ് നിലവില്‍ കോവിഡ് രോഗികളില്ലാത്തത്.

ഇന്ന് 61 പേര്‍ക്കാണ് രോഗം ഭേദമയത്. കണ്ണൂർ ജില്ലയിൽ നിന്നുള്ള 19 പേരും കോട്ടയം ജില്ലയിൽ നിന്നുള്ള 12 പേരും ഇടുക്കി ജില്ലയിൽ നിന്നുള്ള 11 പേരും കൊല്ലം ജില്ലയിൽ നിന്നുള്ള 9 പേരും കോഴിക്കോട് ജില്ലയിൽ നിന്നുള്ള 4 പേരും മലപ്പുറം, കാസർഗോഡ്, തിരുവനന്തപുരം ജില്ലകളിൽ നിന്നുള്ള രണ്ടു പേരുടെ വീതവും പരിശോധനാ ഫലമാണ് നെഗറ്റീവായത്. ഇതോടെയാണ് തിരുവനന്തപുരം, മലപ്പുറം, കോഴിക്കോട് ജില്ലകള്‍ കോവിഡ് രോഗികൾ ഇല്ലാത്ത ജില്ലകളായത്.

അവസാന 21 ദിവസം പുതിയ കോവിഡ് കേസുകള്‍ റിപ്പോര്‍ട്ട് ചെയ്യാത്ത, ചികിത്സയില്‍ രോഗികളും ഇല്ലാത്ത ജില്ലകള്‍ ഗ്രീന്‍ സോണില്‍ ഉള്‍പ്പെടുത്തും. ഈ മാനദണ്ഡപ്രകാരം നിലവില്‍ എറണാകുളം, തൃശൂര്‍, ആലപ്പുഴ ജില്ലകളാണ് ഗ്രീന്‍ സോണിലുള്ളത്.

സംസ്ഥാനത്ത് തുടര്‍ച്ചയായ രണ്ടാം ദിവസവും ആർക്കും കോവിഡ്-19 സ്ഥിരീകരിച്ചിട്ടില്ലെന്ന് മുഖ്യമന്ത്രി പിണറായി വിജയൻ അറിയിച്ചു. 462 പേരാണ് ഇതുവരെ കോവിഡിൽ നിന്നുംമുക്തി നേടിയത്. 34 പേരാണ് നിലവിൽ സംസ്ഥാനത്തെ വിവിധ ആശുപത്രികളിൽ ചികിത്സയിലുള്ളത്.

സംസ്ഥാനത്തെ വിവിധ ജില്ലകളിലായി 21,724 പേർ നിരീക്ഷണത്തിലാണ്. ഇവരിൽ 21,352 പേർ വീടുകളിലും 372 പേർ ആശുപത്രികളിലും നിരീക്ഷണത്തിലാണ്. 62 പേരെയാണ് തിങ്കളാഴ്ച ആശുപത്രിയിൽ പ്രവേശിപ്പിച്ചത്. ഇതുവരെ 33,010 വ്യക്തികളുടെ (ഓഗ്മെന്റഡ് സാമ്പിൾ ഉൾപ്പെടെ) സാമ്പിൾ പരിശോധനയ്ക്ക് അയച്ചിട്ടുണ്ട്. ഇതിൽ ലഭ്യമായ 32,315 സാമ്പിളുകളുടെ പരിശോധനാഫലം നെഗറ്റിവ് ആണ്. ഇതുകൂടാതെ സെന്റിനൽ സർവൈലൻസിന്റെ ഭാഗമായി ആരോഗ്യ പ്രവർത്തകർ, അതിഥി തൊഴിലാളികൾ, സാമൂഹിക സമ്പർക്കം കൂടുതലുള്ള വ്യക്തികൾ മുതലായ മുൻഗണനാ ഗ്രൂപ്പുകളിൽ നിന്ന് 2431 സാമ്പിളുകൾ ശേഖരിച്ചതിൽ 1846 സാമ്പിളുകൾ നെഗറ്റീവ് ആയി.

സംസ്ഥാനത്ത് തിങ്കളാഴ്ച പുതിയ ഹോട്ട് സ്‌പോട്ടുകൾ ഇല്ല. ആകെ 84 ഹോട്ട് സ്‌പോട്ടുകളാണ് നിലവിലുള്ളത്.