യു.എ.ഇയില്‍ 85 പേര്‍ക്ക് കൂടി കൊറോണ : 7 പേര്‍ക്ക് ഭേദമായി

അബുദാബി•രാജ്യത്ത് 85 പുതിയ കൊറോണ വൈറസ് കേസുകൾ കൂടി സ്ഥിരീകരിച്ചതായി യു.എ.ഇ ആരോഗ്യ മന്ത്രാലയം ബുധനാഴ്ച അറിയിച്ചു. ഇതോടെ രാജ്യത്തെ മൊത്തം അണുബാധകളുടെ എണ്ണം 333 ആയി. യു.എ.ഇ ആരോഗ്യമേഖലയുടെ വക്താവ് ഡോ. ഫരീദ അൽ ഹൊസാനി നടത്തിയ പതിവ് മാധ്യമസമ്മേളനത്തിലാണ് ഇക്കാര്യം അറിയിച്ചത്.

പുതിയ കേസുകളിൽ 7 യു.എ.ഇ പൗരന്മാരും മറ്റു രാജ്യങ്ങളില്‍ നിന്നുള്ളവരും ഉള്‍പ്പെടുന്നു.

രോഗം ഭേദമായതിനെ തുടർന്ന് 7 പേർ ആശുപത്രി വിട്ടിട്ടുണ്ടെന്നും മന്ത്രാലയം അറിയിച്ചു. ഇതോടെ ആകെ ഭേദപ്പെട്ട കേസുകളുടെ എണ്ണം 52 ആയി.

കൊറോണ വൈറസിന്റെ 50 പുതിയ കേസുകളും നാല് പേരുടെ ഭേദപ്പെടലും ചൊവ്വാഴ്ച മന്ത്രാലയം പ്രഖ്യാപിച്ചിരുന്നു.

രാജ്യത്ത് വൈറസ് പടരാതിരിക്കാൻ സ്വീകരിച്ച മുൻകരുതൽ നടപടികളെക്കുറിച്ചും അൽ ഹൊസാനി വിശദീകരിച്ചു.

രോഗബാധിതരായ ഭൂരിഭാഗം ആളുകളും 20 നും 44 നും ഇടയിൽ പ്രായമുള്ളവരാണ്. ആളുകള്‍ വീട്ടിൽ താമസിക്കണമെന്നും ആവശ്യങ്ങൾക്ക് ഒഴികെ പുറത്തു പോകരുതെന്നും ജനങ്ങളോട് അഭ്യർത്ഥിക്കുന്നതായി അവര്‍ പറഞ്ഞു. വ്യക്തമായ ഫലങ്ങളിൽ എത്തിച്ചേരാനും രോഗബാധിതരുടെ എണ്ണം കുറയാനും തങ്ങൾക്ക് കുറച്ച് സമയം വേണ്ടി വന്നേക്കാം. സർക്കാർ അംഗീകാരമുള്ള ടെസ്റ്റുകള്‍ക്കായി കാത്തിരിക്കണമെന്നും വാണിജ്യപരമായി പരസ്യം ചെയ്യുന്ന ടെസ്റ്റുകളൊന്നും അവലംബിക്കരുതെന്നും അവർ പൊതുജനങ്ങളോട് അഭ്യർത്ഥിച്ചു.

സാനിറ്റൈസറുകള്‍ ഉപയോഗിക്കുമ്പോള്‍ അവയുടെ ചേരുവ പരിശോധിക്കണമെന്നും അവര്‍ പൊതുജനങ്ങളോട് അഭ്യര്‍ഥിച്ചു. ഫലപ്രദമാകാൻ കുറഞ്ഞത് 60 ശതമാനത്തിലധികം ആള്‍ക്കഹോള്‍ ഉണ്ടായിരിക്കണമെന്നും അവര്‍ കൂട്ടിച്ചേര്‍ത്തു.