രോഗികൾക്ക് ആശ്വാസമായി യുഎഇ: കൊറോണ വൈറസ് കേസുകൾക്ക് സൗജന്യ ചികിത്സ, ഇൻ‌ഷുറൻസ് ആവശ്യമില്ല

ദുബായ്: യുഎഇയിൽ റിപ്പോർട്ട് ചെയ്യുന്ന എല്ലാ കൊറോണ വൈറസ് ബാധിത കേസുകൾക്കും സൗജന്യ ചികിത്സ ഉറപ്പാക്കി അധികൃതർ. എല്ലാ കേസുകളിലും, രോഗികൾക്ക് ഇൻഷുറൻസ് ഉണ്ടോ ഇല്ലയോ എന്നത് പരിഗണിക്കാതെ തന്നെ സൗജന്യമായി ചികിത്സിക്കണം – ആരോഗ്യ വകുപ്പ് അധികൃതർ ആശുപത്രികൾക്ക് നിർദ്ദേശം നൽകി. ആശുപത്രികൾക്ക് ദുബായ് ഹെൽത്ത് അതോറിറ്റി (ഡിഎച്ച്എ) നൽകിയ സർക്കുലർ അനുസരിച്ച് – ആരോഗ്യ-പ്രതിരോധ മന്ത്രാലയത്തിന്റെ (മൊഹാപ്) നിർദ്ദേശങ്ങൾ ഇങ്ങനെ.

എല്ലാ ഡിഎച്ച്എ-ലൈസൻസുള്ള ആരോഗ്യ സൗകര്യങ്ങളും 2019-nCoV യുടെ സംശയാസ്പദമായ അല്ലെങ്കിൽ സ്ഥിരീകരിച്ച കേസുകൾ അടിയന്തിര കേസുകളായി പരിഗണിക്കണമെന്നും ഉണ്ട്. കൂടാതെ എല്ലാ കേസുകളെയും രണ്ട് വിഭാഗങ്ങളായി തരംതിരിക്കണമെന്ന് ഖലീജ് ടൈംസ് പ്രസിദ്ധീകരിച്ച സർക്കുലറിൽ പറയുന്നു: ഒന്ന് ഇൻഷുറൻസ് പരിരക്ഷയുള്ളവർക്ക്, മറ്റൊന്ന് ഇൻഷുറൻസ് പരിരക്ഷ ലഭ്യമല്ലാത്തത്.

“രോഗിക്ക് ഇൻഷുറൻസ് ഉണ്ടെങ്കിൽ, ഇൻഷുറൻസ് നിയന്ത്രണമനുസരിച്ച് കേസുകൾ അടിയന്തിര സാഹചര്യങ്ങളായി കണക്കാക്കുകയും ഇൻഷുറൻസ് കമ്പനികൾ സ്വീകരിക്കുന്ന ഏതെങ്കിലും ക്ലെയിമുകളെ മാനിക്കുകയും ചെയ്യും,” സർക്കുലർ പറഞ്ഞു.ഇൻഷ്വർ ചെയ്യാത്തവർക്കായി, “കേസുകൾ എപ്പോഴും അടിയന്തിരാവസ്ഥയായി കണക്കാക്കപ്പെടും, സംശയാസ്പദമോ സ്ഥിരീകരിക്കപ്പെട്ടതോ ആയ കേസുകൾക്ക് ഏതെങ്കിലും ആരോഗ്യ പരിരക്ഷാ സൗകര്യങ്ങളിൽ ആരോഗ്യസംരക്ഷണച്ചെലവുകൾ രോഗി വഹിക്കേണ്ടതില്ല, പൂർണ്ണമായും സൗജന്യമായിരിക്കും.

“ഇത് സമൂഹത്തിന്റെ ആരോഗ്യവും സുരക്ഷയും ഉറപ്പുവരുത്തുന്നതിനും സ്ഥിരീകരിച്ചതോ സംശയിക്കപ്പെടുന്നതോ ആയ അണുബാധയുള്ള രോഗികൾക്ക് ശരിയായ ആരോഗ്യ സേവനങ്ങൾ നൽകുന്നതിനാണ്.” സർക്കുലറിൽ പറയുന്നു. നിലവിൽ യുഎഇയിൽ അഞ്ച് nCoV-positive രോഗികളുണ്ട്, ഇതിൽ നാല് അംഗ ചൈനീസ് കുടുംബവും ഒരു ചൈനീസ് ടൂറിസ്റ്റും ഉൾപ്പെടുന്നു. ഇവരെല്ലാം സ്റ്റേബിളാണെന്നും ഇവർക്കുള്ള ചികിത്സ നടക്കുന്നതായും അധികൃതർ വ്യക്തമാക്കി.