കേരളത്തില്‍ നിന്നുള്ള പുരോഹിതന്‍ തമിഴ്നാട്ടിലെ ആശ്രമത്തില്‍ മരിച്ചനിലയില്‍: മൃതദേഹം കണ്ടെത്തിയത് അഴുകിയ നിലയില്‍

ചെന്നൈ• തിരുവള്ളൂരിനടുത്തുള്ള തിരുപ്പച്ചൂരിലെ ആശ്രമത്തിൽ കേരളത്തിൽ നിന്നുള്ള 68 കാരനായ പുരോഹിതനെ മരിച്ച നിലയിൽ കണ്ടെത്തി. പ്രത്യേക പൂജകൾ നടത്തി വന്നിരുന്ന പണിക്കര്‍ എന്നയാളാണ് മരിച്ചതെന്ന് പോലീസ് പറഞ്ഞു. വിലിവക്കത്തിൽ വീടുണ്ടായിരുന്ന പണിക്കർ കഴിഞ്ഞയാഴ്ച ആശ്രമത്തിൽ പോകുകയും പൂജയ്ക്കായി അവിടെ താമസിക്കുകയും ചെയ്തു. പൂട്ടിയിട്ടിരുന്ന ആശ്രമത്തിൽ നിന്ന് ദുർഗന്ധം വരുന്നത് ഏതാനും ആട്ടിടയന്മാര്‍ ശ്രദ്ധിക്കുകയും പ്രാദേശിക പോലീസിനെ അറിയിക്കുകയും ചെയ്തു. തുടര്‍ന്ന് ആശ്രമത്തിലെത്തി പരിശോധന നടത്തിയ പോലീസ് സംഘം പണിക്കാരെ മരിച്ച നിലയില്‍ കണ്ടെത്തുകയായിരുന്നു. മൃതദേഹം അഴുകി തുടങ്ങിയിരുന്നു. മൃതദേഹം അവർ പോസ്റ്റ്‌മോർട്ടത്തിനായി തിരുവള്ളൂരിലെ സർക്കാർ ആശുപത്രിയിലേക്ക് മാറ്റിയതായും പോലീസ് അറിയിച്ചു.

കേരളത്തിൽ താമസിക്കുന്ന പുരോഹിതന്റെ മകൻ ശങ്കറുമായി പോലീസ് ബന്ധപ്പെട്ടു. പൂജ നടത്തി നാട്ടിലേക്ക് മടങ്ങുമെന്നാണ് പിതാവ് പറഞ്ഞിരുന്നതെന്ന് ശങ്കർ പോലീസിനോട് പറഞ്ഞു. എന്നാല്‍ പിന്നീട് അദ്ദേഹത്തെക്കുറിച്ച് വിവരമൊന്നും ലഭിച്ചില്ല.

പുരോഹിതൻ തന്നെ ഭീഷണിപ്പെടുത്തിയ ചില ഗ്രാമീണരുമായി വഴക്കിട്ടിരുന്നതായി പോലീസ് നടത്തിയ അന്വേഷണത്തില്‍ കണ്ടെത്തി. കാട്ടുപന്നികളെ കുടുക്കാനും മൃഗങ്ങളെ അവരുടെ കൃഷിയിടങ്ങളിൽ പ്രവേശിക്കുന്നത് തടയാനും വൈദ്യുത വേലികള്‍ സ്ഥാപിച്ച ചില കര്‍ഷകര്‍ക്കെതിരെ പണിക്കര്‍ പരാതി നല്‍കിയിരുന്നു.

തിരുപ്പച്ചൂർ പോലീസ് സെക്ഷന്‍ 174 പ്രകാരം സംശയാസ്പദമായ മരണത്തിന് കേസെടുത്ത് അന്വേഷണം ആരംഭിച്ചു. മൃതദേഹം അഴുകിയതിനാൽ പണിക്കറിന് ബാഹ്യ പരിക്കുകളുണ്ടോയെന്ന് സ്ഥിരീകരിക്കാൻ കഴിയില്ലെന്ന് പോലീസ് പറഞ്ഞു. പോസ്റ്റ്‌മോർട്ടം റിപ്പോർട്ടിനായി കാത്തിരിക്കുകയാണെന്നും പോലീസ് പറഞ്ഞു.