അനന്ത്നാഗ്: ജമ്മു കശ്മീരിലെ അനന്തനാഗ് ജില്ലയിലെ കോകര്‍നാഗില്‍ മുന്‍ പിഡിപി നേതാവ് സജാദ് ഹുസൈന്‍ മന്തൂവിനെതിരെ ഭീകരര്‍ വെടിയുതിര്‍ത്തു. ഇദ്ദേഹത്തെ അടിയന്തരമായി ആശുപത്രിയില്‍ പ്രവേശിപ്പിച്ചിരിക്കുകയാണെന്ന് പൊലീസ് അറിയിച്ചു.വീട്ടില്‍ വെച്ചാണ് സജാദിനെതിരെ ഭീകരര്‍ ആക്രമണം നടത്തിയത്. ആക്രമണത്തില്‍ അദ്ദേഹത്തിന്റെ വയറിലും തുടയിലും പരിക്കേറ്റതായി പൊലീസ് പറഞ്ഞു.
ആശുപത്രിയില്‍ പ്രവേശിപ്പിച്ച സജാദ് അപകടനില തരണം ചെയ്തതായും പൊലീസ് വ്യക്തമാക്കി.നേരത്തെ അനന്തനാഗ് ഡെപ്യൂട്ടി കമ്മീഷണര്‍ ഓഫീസിന് സമീപം ഭീകരര്‍ നടത്തിയ ഗ്രനേഡ് ആക്രമണത്തില്‍ പതിനാല് പേര്‍ക്ക് പരിക്കേറ്റിരുന്നു. കശ്മീരില്‍ സര്‍ക്കാര്‍ നിയന്ത്രണങ്ങള്‍ പടിപടിയായി നീക്കി കൊണ്ടിരിക്കുന്ന സാഹചര്യത്തിലെ ഭീകരരുടെ ആക്രമണങ്ങളെ കൃത്യമായി നിരീക്ഷിക്കുന്നുണ്ടെന്നും സംഭവത്തിന് പിന്നിലുള്ളവര്‍ ഉടന്‍ പിടിയിലാകുമെന്നും പൊലീസ് വ്യക്തമാക്കി.
ആക്രമണത്തിന് പിന്നിലെ കാരണം വ്യക്തമല്ല. പ്രദേശം സൈന്യം വളഞ്ഞിരിക്കുകയാണ്. സംഭവത്തില്‍ അന്വേഷണം ആരംഭിച്ചതായി ജമ്മു കശ്മീര്‍ പൊലീസ് അറിയിച്ചു.
Post Your Comments