ബീഫ് കറിയും കപ്പയും ചിക്കനും, പിന്നെ ഇത്തിരി മധുരവും; വിയ്യൂരിന് പിന്നാലെ സ്‌പെഷ്യല്‍ കോംബോ ഓഫറുമായി കോഴിക്കോട് ജില്ലാ ജയില്‍

കോഴിക്കോട്: ചൂടുള്ള കിടിലന്‍ ബിരിയാണി, ചിക്കന്‍ കറി, ചപ്പാത്തി, ഇവയൊക്കെ കഴിച്ച് വയറുനിറയുമ്പോള്‍ മധുരത്തിന് ഒരു കപ്പ് കേക്ക്. വിയ്യൂര്‍ ജയിലിലെ സ്പെഷ്യല്‍ കോംബോയിലെ വിഭവങ്ങള്‍ ഇതൊക്കെയായിരുന്നു. ഒരു കുപ്പി വെള്ളം ഉള്‍പ്പെടെ ആരെയും അതിശയിപ്പിക്കുന്ന വിലയിലെത്തിയ ഈ സ്‌പെഷ്യല്‍ കോംബോയ്ക്ക് ആവശ്യക്കാര്‍ നിരവധിയായിരുന്നു. വിയ്യൂര്‍ ജയിലിലെ സ്‌പെഷ്യല്‍ കോംബോ ഹിറ്റായതോടെ ഇപ്പോള്‍ കോഴിക്കോട് ജില്ലാ ജയിലിലും സ്പെഷ്യല്‍ കോംബോ ഇറക്കിയിരിക്കുകയാണ്. വിയ്യൂര്‍ ജയിലിലേതിന് സമാനമാണ് ഇവിടുത്തെ സ്‌പെഷ്യല്‍ കോംബോ എങ്കിലും ഇത്തിരി മാറ്റങ്ങള്‍ ഉണ്ട്.

ബീഫ് കറിയും കപ്പയും ചിക്കന്‍ കറിയും ചപ്പാത്തിയും ആണ് ഇവിടുത്തെ സ്പെഷ്യല്‍. 200 ഗ്രാം ബീഫ് കറിയും നാല് ചപ്പാത്തിയും 300 ഗ്രാം കപ്പയും മില്‍ക്ക് പേഡയും ഒരു കുപ്പി വെള്ളവും ഉള്‍പ്പെട്ടതാണ് ഇവിടുത്തെ ബീഫ് കോംബോ. ചിക്കന്‍ കോംബോയിലാണെങ്കില്‍ 200 ഗ്രാം ചിക്കന്‍ കറിയും അഞ്ച് ചപ്പാത്തിയും 100 ഗ്രാം ചിക്കന്‍ ഡ്രൈ ഫ്രൈയും ഒരു കുപ്പി വെള്ളവും മില്‍ക്ക് പേഡയും ഉണ്ടാകും. രണ്ടു കോംബോയുടെയും വില 127രൂപ തന്നെയാണ്. ഇപ്പോള്‍ ഓണ്‍ലൈന്‍ ഭക്ഷണ വിതരണ ശൃംഖലയായ സ്വിഗ്ഗിയുമായി കരാറുണ്ട്. പദ്ധതി ഉദ്ഘാടനം ജില്ലാ ജയിലിന്റെ പുറത്തുള്ള കൗണ്ടറില്‍ ഉത്തരമേഖല ഡിഐജി സാം തങ്കയ്യന്‍ നിര്‍വഹിച്ചു.