വീടിനു പരിസരത്തു കളിച്ചു കൊണ്ടിരുന്ന നാല് വയസുകാരിയെ കാണാതായി , മൂന്ന് വര്‍ഷത്തിന് ശേഷം മോചനദ്രവ്യം ആവശ്യപ്പെട്ട് ഫോണ്‍ കോള്‍

നോയിഡ: പെണ്‍കുട്ടിയെ കാണാതായി മൂന്ന് വര്‍ഷത്തിന് ശേഷം മോചനദ്രവ്യം ആവശ്യപ്പെട്ട് ഭീഷണി ഫോണ്‍ കോള്‍. നോയിഡ സ്വദേശിനിയായ കാഷിഷ് റാവത്തിനെ മൂന്ന് വര്‍ഷം മുമ്പാണ് കാണാതായത്. വീടിന് സമീപം കളിച്ചുകൊണ്ടിരുന്ന കുട്ടിയെ കാണാതാവുകയായിരുന്നു. അന്ന് നാല് വയസായിരുന്നു കാഷിഷിന് പ്രായം. മൂന്ന് വര്‍ഷമായി കുട്ടിയെക്കുറിച്ച്‌ യാതൊരു വിവരവുമില്ല.

2016 മെയ് 12ന് വീടിന് സമീപത്തെ പാര്‍ക്കില്‍ നിന്നുമാണ് കുട്ടിയെ കാണാതായത്. അന്ന് തന്നെ കുട്ടിയുടെ കുടുംബം പരാതി നല്‍കിയിരുന്നു. എന്നാല്‍ പോലീസ് അന്വേഷണത്തില്‍ വിവരമൊന്നും ലഭിച്ചില്ല. പോലീസ് അന്വേഷണത്തിലെ വീഴ്ചയ്‌ക്കെതിരെ കുട്ടിയുടെ കുടുംബം പലതവണ രംഗത്ത് വന്നിരുന്നു.

10 ലക്ഷം രൂപ മോചനദ്രവ്യം നല്‍കണമെന്ന് ആവശ്യപ്പെട്ടാണ് കോള്‍ വന്നത്. കുടുംബം ഈ വിവരം ഉടന്‍ തന്നെ പോലീസില്‍ അറിയിച്ചു.പോലീസ് അന്വേഷണം ആരംഭിച്ചിട്ടുണ്ട്.