ന്യൂഡല്‍ഹി: ഡല്‍ഹിയില്‍ നിന്നും സാന്‍ ഫ്രാന്‍സിസ്കോയിലേക്ക് പുറപ്പെട്ട വിമാനത്തിന്റെ വാതിലില്‍ സുഷിരം കണ്ടെത്തി. എ.ഐ 183 എന്ന്‌ പേരുള്ള ബോയിംഗ് ബി 777 വിമാനം സാന്‍ ഫ്രാന്‍സിസ്കോയില്‍ നിലത്തിറങ്ങിയ ശേഷമാണ് പ്രവേശന വാതിലില്‍ സുഷിരം കണ്ടെത്തിയത്. 225 യാത്രക്കാരായിരുന്നു വിമാനത്തിലുണ്ടായിരുന്നത്.
വിശദ പരിശോധനയ്ക്കായി വിമാനം ഡോക്കിലേക്ക് മാറ്റിയിട്ടുണ്ട്. ഡല്‍ഹി മുതല്‍ സാന്‍ ഫ്രാന്‍സിസ്കോ വരെയുള്ള വിമാനമാര്‍ഗമാണ് ഏറ്റവും ദൈര്‍ഘ്യം കൂടിയതെന്ന് കണക്കാക്കപ്പെടുന്നത്. അതുകൊണ്ടുതന്നെ യാത്രാമാര്‍ഗ്ഗം വിമാനത്തില്‍ കേടുപാടുകള്‍ സംഭവിക്കുന്നത് വന്‍ ദുരന്തത്തിലേക്കാണ് കൊണ്ടുചെന്നെത്തിക്കുക. സുരക്ഷാ വീഴ്ചയ്ക്കുള്ള കാരണം ആരാഞ്ഞ് വിമാനത്തിലെ സ്റ്റാഫിനെ ചോദ്യം ചെയ്തുവരികയാണ്. സുരക്ഷാ വീഴ്ച്ച സംഭവിച്ചതിന്റെ കാരണം കണ്ടെത്താന്‍ എയര്‍ ഇന്ത്യ അന്വേഷണം പ്രഖ്യാപിച്ചിട്ടുണ്ട്.
Post Your Comments