അഞ്ചല്‍: വാക്കുതര്‍ക്കത്തെ തുടര്‍ന്നു ഗൃഹനാഥനെ വീട്ടില്‍ നിന്നു വിളിച്ചിറക്കി വെട്ടി പരുക്കേല്‍പിച്ചു. കഴിഞ്ഞ ദിവസം രാത്രിയാണു സംഭവം. അഞ്ചല്‍ അസുരമംഗലം കണ്ണംകോട് ജങ്ഷനില്‍ താമസിക്കുന്ന സിബിയെയാണ് വെട്ടി പരുക്കേല്‍പിച്ചത്. സംഭവത്തിലെ പ്രതികളിലൊരാളായ വയലാ അനില്‍ മന്ദിരത്തില്‍ അനീഷി(31)നെ എസ്.ഐ. എന്‍. അശോകന്റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തു.മറ്റൊരു പ്രതിയായ കരുകോണ്‍ സ്വദേശി ഷാജഹാന്‍ ഒളിവിലാണ്.
തലയ്ക്കു ഗുരുതരമായി പരുക്കേറ്റ സിബിയെ തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. പകല്‍ സമയം റോഡില്‍ വച്ചുണ്ടായ വാക്കുതര്‍ക്കത്തെ തുടര്‍ന്നാണു രാത്രി ഒന്‍പതോടെ അനീഷും ഷാജഹാനും സിബിയുടെ വീട്ടില്‍ എത്തുകയും തര്‍ക്കം പറഞ്ഞു തീര്‍ക്കാമെന്നു പറഞ്ഞു വീട്ടില്‍ നിന്നു വിളിച്ചിറക്കി വെട്ടി പരുക്കേല്‍പിച്ചത്. അനീഷിനെതിരെ വധശ്രമത്തിനു കേസെടുത്ത് കോടതിയില്‍ ഹാജരാക്കി റിമാന്‍ഡ് ചെയ്തു.
Post Your Comments