ഹൈദരാബാദ്: ഐപിഎല്ലിൽ തിളങ്ങിയാൽ ലോകകപ്പ് ടീമിൽ കയറിപ്പറ്റാമെന്ന് കരുതിയ ഇന്ത്യൻ താരങ്ങൾക്ക് തിരിച്ചടി. ഐപിഎല്ലിലെ പ്രകടനവും ലോകകപ്പ് ടീം സെലക്ഷനുമായി യാതൊരു ബന്ധവുമില്ലെന്ന് ക്യാപ്റ്റൻ വിരാട് കോഹ്ലി തന്നെയാണ് വ്യക്തമാക്കിയത്. ലോകകപ്പ് ടീം തിരഞ്ഞെടുപ്പിൽ ഐപിഎല്ലിലെ പ്രകടനങ്ങൾ എന്തെങ്കിലും സ്വാധീനം ചെലുത്തുമെന്നു ഞാൻ കരുതുന്നില്ല. ഇത്തരം വിശകലനങ്ങളെല്ലാം തീർത്തും തെറ്റാണ്. ഏറ്റവും സ്ഥിരതയുള്ള ടീമാണ് ലോകകപ്പിലേക്കു നമുക്കു വേണ്ടത്. ഐപിഎല്ലിനായി പിരിയും മുൻപു തന്നെ ലോകകപ്പ് ടീമിനെക്കുറിച്ച് വ്യക്തമായ ധാരണ രൂപപ്പെടുത്തേണ്ടതുണ്ട്. ഐപിഎല്ലിലെ പ്രകടനങ്ങൾ ഈ തീരുമാനത്തിൽ എന്തെങ്കിലും മാറ്റമുണ്ടാക്കാൻ സാധ്യത തീർത്തും വിരളമാണെന്നും കോഹ്ലി വ്യക്തമാക്കി.
ഒന്നോ രണ്ടോ താരങ്ങൾക്ക് ഐപിഎല്ലിൽ മികച്ച പ്രകടനം കാഴ്ചവയ്ക്കാനായില്ലെങ്കിൽ അവർ ലോകകപ്പ് ടീമിലുണ്ടാകില്ല എന്നൊന്നും അർഥമില്ല. ഐപിഎല്ലിലെ പ്രകടനം നമ്മുടെ തീരുമാനങ്ങളെ സ്വാധീനിക്കാനോ ബാധിക്കുവാനോ പോകുന്നില്ലെന്നും കോഹ്ലി കൂട്ടിച്ചേർത്തു. ലോകകപ്പിനു മുന്നോടിയായി ഋഷഭ് പന്തിന് കുറച്ചുകൂടി മൽസരങ്ങളിൽ അവസരം നൽകുമെന്നും കോഹ്ലി വ്യക്തമാക്കി.
Post Your Comments