നടന്നത് സിപിഎം ആസുത്രിത ആക്രമം, പൊലീസ് അക്രമത്തിന് കൂട്ടുനിന്നെന്നും എംടി രമേശ്

തിരുവനന്തപുരം : സെക്രട്ടറിയേറ്റിന് മുന്നില്‍ സിപിഎം നടത്തിയ ആക്രമണത്തിന് പൊലീസ് കൂട്ടിനില്‍ക്കുകയായിരുന്നുവെന്ന് ബിജെപി നേതാവ് എംടി.രമേശ്.
ആചാര ലംഘനത്തിനെതിരെ രാജ്യ വ്യാപകമായി വിശ്വാസികളുടെ പ്രതിഷേധം ഉയരുകയാണ്.

ആ പ്രതിഷേധത്തെ വഴിതിരിച്ചു വിടുവാനാണ് സത്യാഗ്രഹ പന്തല്‍ ആക്രമിക്കാന്‍ സിപിഎം തയ്യാറായതെന്നും അദ്ദേഹം ആരോപിച്ചു. കഴിഞ്ഞ 31 ദിവസമായി സമാധാനപരമായാണ് സെക്രട്ടറിയേറ്റിന് മുന്നില്‍ ഈ സമരം നടക്കുന്നത്. ഒരു തരത്തിലുള്ള അസ്വസ്ഥജനകമായ സാഹചര്യം തങ്ങളുടെ ഭാഗത്ത് നിന്നും ഉണ്ടായിട്ടില്ല.

ഇത് സിപിഎം ആസൂത്രിതമായി നടത്തിയ ആക്രമമാണ് . സിപിഎം പ്രവര്‍ത്തകരെ അറസ്റ്റ് ചെയ്യുന്നതിന് പകരം സത്യാഗ്രഹ പന്തലിലേക്ക് ഇരച്ചു കയറാനാണ് പൊലീസ് ശ്രമിച്ചത്. അക്രമത്തിന് പൊലീസ് കൂട്ടുനില്‍ക്കുകയാണെന്നും രമേശ് ആരോപിച്ചു. സത്യാഗ്രഹ പന്തലിലേക്ക് പൊലീസ് ഗ്രനേഡുകള്‍ വലിച്ചെറിഞ്ഞെന്നും ഇതു രാജ്യത്തെവിടേയും കേട്ടുകേള്‍വി പോലുമില്ലാത്ത സംഭവമാണെന്നും അദ്ദേഹം കൂട്ടിച്ചേര്‍ത്തു.