പത്തു വര്‍ഷത്തെ ഇടവേളയ്ക്ക് ശേഷം മമ്മൂട്ടിയും ജോഷിയും വീണ്ടും ഒന്നിക്കുന്നു

കൊച്ചി : സൂപ്പര്‍ ഹിറ്റ് ചിത്രങ്ങളുടെ കൂട്ടുകെട്ടെന്ന് അറിയപ്പെടുന്ന മമ്മൂട്ടിയും ജോഷിയും വീണ്ടും ഒന്നിക്കുന്നു. നീണ്ട 10 വര്‍ഷത്തെ ഇടവേളക്ക ശേഷമാണ് മമ്മൂട്ടി-ജോഷി കൂട്ടുകെട്ടില്‍ ചിത്രം ഒരുങ്ങുന്നത്.

തൊണ്ടിമുതലും ദൃക്‌സാക്ഷിയും എന്ന ഒറ്റ ചിത്രത്തിലൂടെ ഏറെ പ്രേക്ഷകസ്വീകാര്യത നേടിയ തിരക്കഥാകൃത്ത് സജീവ് പാഴൂരാണ് ചിത്രത്തിന്റെ തിരക്കഥ ഒരുക്കുന്നതെന്നാണ് സൂചനകള്‍. ചിത്രത്തെക്കുറിച്ചുള്ള കൂടുതല്‍ വിവരങ്ങള്‍ പുറത്തു വന്നിട്ടില്ല. സന്ദര്‍ഭം, ഒന്നിങ്ങു വന്നെങ്കില്‍, ശ്യാമ, ന്യൂഡല്‍ഹി, ദിനരാത്രങ്ങള്‍, സംഘം, നായര്‍ സാബ്, മഹായാനം, കുട്ടേട്ടന്‍, കൗരവര്‍, സൈന്യം എന്നിവയായിരുന്നു മമ്മൂട്ടി-ജോഷി കൂട്ടുകെട്ടില്‍ പിറവി കൊണ്ട സൂപ്പര്‍ ഹിറ്റ് ചിത്രങ്ങള്‍.
ഇരുവരും അവസാനമായി ഒന്നിച്ച ചിത്രം 2008ല്‍ പുറത്തിറങ്ങിയ മള്‍ട്ടിസ്റ്റാര്‍ ചിത്രമായ ട്വന്റി ട്വന്റിയാണ്. 2007ല്‍ രഞ്ജിത്തിന്റെ രചനയില്‍ ഒരുക്കിയ നസ്രാണിയാണ് മമ്മൂട്ടിയെ മാത്രം നായകനാക്കി ജോഷി ചെയ്ത ചിത്രം.