അയ്യപ്പന്മാർക്ക് കെഎസ്ആർടിസി ബസിൽ സൗജന്യ യാത്ര

ശബരിമല: പമ്പ- ത്രിവേണി റൂട്ടിൽ അയ്യപ്പന്മാർക്ക് സൗജന്യയാത്ര ഒരുക്കി കെഎസ്ആർടിസി ബസുകൾ. രണ്ട് ബസുകളാണ്‌ ഇതിനായി ക്രമീകരിച്ചിരിക്കുന്നത്. ത്രിവേണി പെട്രോൾ പമ്പ് മുതൽ കെഎസ്ആർടിസി സ്റ്റാൻഡ് വരെയാണ് ഈ ബസുകൾ ഓടുന്നത്. കഴിഞ്ഞ വർഷം വരെ പമ്പ-ത്രിവേണി റൂട്ടിൽ 10 രൂപ നിരക്കിൽ യാത്ര ചെയ്യാൻ ഒരുക്കിയിരുന്ന ബസാണ് ഇപ്പോൾ പൂർണമായും സൗ‍ജന്യമാക്കിയത്. ഒരു ബസ് ത്രിവേണിയിലും അടുത്തത് സ്റ്റാൻഡിലും ഉണ്ടാകും. ത്രിവേണിയിലെ ബസിൽ അയ്യപ്പന്മാർ നിറയുമ്പോൾ വിടും. അതേസമയത്തു തന്നെ സ്റ്റാൻഡിലുളള ബസ് ത്രിവേണിക്കും പുറപ്പെടും.