തിരൂര്‍: വിവാദ ടിക്ക് ടോക്ക് ചലഞ്ച് ‘നില്ല് നില്ല് ‘ മൂലം നിരവധിപേർക്ക് പരിക്ക്. മലപ്പുറത്ത് നടന്ന സംഘര്‍ത്തില്‍ ഒരു സ്ത്രീയടക്കം എട്ടുപേർക്കാണ് പരിക്കേറ്റത്. സമൂഹ മാധ്യമങ്ങളിൽ ഏറെ വിവാദമുണ്ടാക്കിയ ഈ ചലഞ്ചിനെതിരെ അധികൃതർ നടപടിക്കൊരുങ്ങവേയാണ് സംഘർഷമുണ്ടായത്. റോഡില്‍ വാഹനങ്ങള്‍ക്കു മുൻപിലേക്ക് ഇറങ്ങി നിന്ന് നില്ല് നില്ല്..നില്ലെന്റെ നീല കുയിലേ.. എന്ന പാട്ടിനൊത്ത് നൃത്തം ചെയ്ത് അതിന്റെ ദൃശ്യം ‘ടിക് ടോക്’ എന്ന ആപ്പില്‍ പോസ്റ്റ് ചെയ്യുന്നതാണ് ചലഞ്ച്.
ഒറ്റക്കും സംഘമായും ഒട്ടേറെ പേര്‍ ഇങ്ങനെ വിഡിയോ എടുക്കുന്നുണ്ട്. സമൂഹ മാധ്യമങ്ങളിലടക്കം ഏറെ വിമര്‍ശനങ്ങളാണ് ചലഞ്ചിനെതിരെ ഉയരുന്നത്. ചാലഞ്ചിൽ ഉണ്ടാകാൻ സാധ്യതയുള്ള അപകടം മുൻനിർത്തിയാണ് വിമർശനം. ഇതേപോലെ പൂങ്ങോട്ട് കുളത്തെ ഒരു കോളജ് പരിസരത്ത് വിദ്യാര്‍ത്ഥികള്‍ നടത്തിയ ചലഞ്ചാണ് സംഘര്‍ഷത്തിനു കാരണമായത്. വെള്ളിയാഴ്ച ഈ കോളേജിലെ വിദ്യാർഥികൾ വാഹനങ്ങൾ തടഞ്ഞ് ചാലഞ്ച് ഏറ്റെടുത്തു നൃത്തം ചെയ്തു.
എന്നാൽ ഇത് മൂലമുണ്ടായ ഗതാഗതക്കുരുക്ക് ചിലർ ചോദ്യം ചെയ്തതോടെ വാക്കേറ്റമുണ്ടായെങ്കിലും ഒത്തുതീർപ്പായി. എന്നാൽ തിങ്കളാഴ്ച വീണ്ടും വിദ്യാർഥികൾ തങ്ങളുടെ സുഹൃത്തുക്കളോടൊപ്പമെത്തി ക്രിക്കറ്റ് സ്റ്റമ്പ് , കമ്പി , കത്തി തുടങ്ങി ആയുധങ്ങളുമായി ചോദ്യം ചെയ്തവരെ ആക്രമിച്ചതായാണ് പരാതി. തിരൂര്‍ സ്വദേശികളായ നസീം, ഫര്‍ഹാന്‍, ഷാഹിദ്, ഷൗക്കത്ത്, റാഫി, സച്ചിന്‍, മന്നാന്‍, സൗത്ത് അന്നാര സ്വദേശി സുജാത എന്നിവര്‍ക്കാണ് പരിക്കേറ്റത്. ഇവരെ തിരൂര്‍ ജില്ല ആശുപത്രിയില്‍ പ്രവേശിപ്പിച്ചു.
Post Your Comments