“ഒന്നാണ് നമ്മള്‍ ” കേരളത്തെ പടുത്തുയര്‍ത്താനായി യുഎഇ വേദിയാകുന്നു , താരസമ്പന്നമായ വിനോദ പരിപാടിക്ക് !

അബുദാബി :  യുഎഇ വേദിയാകുന്നു ! താരനിബിഡമായ വിനോദ പരിപാടിക്കായി. ഈ വരുന്ന ഡിസംബര്‍ 7 ന് അബുദാബി സായുധ സേനാ ഓഫീസേഴ്സ് ക്ലബ്ബില്‍ കലാമാമാങ്കത്തിന് തിരി തെളിയുമെന്ന് നടന്‍ മോഹന്‍ലാല്‍ യുഎഇയില്‍ ചേര്‍ന്ന വാര്‍ത്താ സമ്മേളനത്തില്‍ അറിയിച്ചു. പ്രളയദുരിതത്തില്‍ പെട്ട കേരളത്തെ വീണ്ടും കരകയറ്റുന്നതിനായാണ് ഈ വലിയ പരിപാടി നടത്തുത്തുവാന്‍ പോകുന്നതെന്നും മോഹന്‍ലാല്‍ അറിയിച്ചു .

സ്റ്റാര്‍ ഇന്ത്യ പ്രെെവറ്റ് ലിമിറ്റഡ് മാനേജിങ്ങ് ഡയറക്ടര്‍ കെ .മാധവനും അദ്ദേഹത്തിനൊപ്പം പത്രസമ്മേളനത്തില്‍ പങ്കെടുത്തു. കേരളത്തില്‍ പ്രളയത്തെ തുടർന്ന് 483 ഒാളം പേരുടെ ജീവനായിരുന്നു പൊലിഞ്ഞത്. 20000 കോടിയോളം വരുന്ന നാശനഷ്ടങ്ങള്‍ വന്നതായാണ് കണക്ക്. ഈ അവസ്ഥയില്‍ നിന്ന് കേരളത്തെ കെെപിടിച്ച് ഉയര്‍ത്തുന്നതിനായാണ് ഒന്നാണ് നമ്മള്‍ യുഎഇയില്‍ ഒരുങ്ങാന്‍ പോകുന്നത്.

ഏകദേശം 5 കോടി രൂപയുടെ ടിക്കറ്റ് വില്‍ക്കപ്പെടുമെന്നാണ് പ്രതീക്ഷിക്കുന്നത്. തുക മുഖ്യമന്ത്രിയുടെ ദുരുതാശ്വാസ ഫണ്ടിലേക്ക് സംഭാവന നല്‍കുമെന്നും ബന്ധപ്പെട്ടവര്‍ അറിയിച്ചു. വ്യത്യസ്ത ഭാവത്തിലായിരിക്കും പരിപാടി നടക്കുക . 3 ഡി മാപ്പിങ്ങ് സാങ്കേതിക വിദ്യ അടക്കമുളളവ പരിപാടിക്ക് വ്യത്യസ്തത നല്‍കും . 60 തോളം സിനിമ ആര്‍ട്ടിസ്റ്റുകളാണ് പരിപാടിയില്‍ അണിനിരക്കുക . കൂടാതെ കലാ മേഖലയിലുളള നിരവധി പേരുടെ സാന്നിധ്യവും ഒന്നാണ് നമ്മള്‍ പരിപാടിയില്‍ ഉണ്ടാകും.