നീണ്ട ഇടവേളയ്ക്ക് ശേഷം ‘ശക്തിമാന്‍’ തിരിച്ചുവരുന്നു; മിനി സ്‌ക്രീനിൽ നിന്ന് ഇനി ബിഗ്‌സ്‌ക്രീനിലേക്ക്

ഒരു കാലത്ത് കുട്ടികൾക്ക് ഏറ്റവും പ്രിയപ്പെട്ട കഥാപാത്രമായിരുന്നു ശക്തിമാൻ. നീണ്ട വർഷങ്ങൾക്ക് ശേഷം ശക്തിമാൻ ബിഗ് സ്‌ക്രീനിലൂടെ തിരിച്ചുവരികയാണ്. ടെലിവിഷന്‍ രംഗത്ത് വിപ്ലവം സൃഷ്ടിച്ച ആ കഥാപാത്രം മുകേഷ് ഖന്നയായിരുന്നു.

1997 മുതല്‍ 2005 വരെ 520 എപ്പിസോഡുകള്‍ ആയി ദൂരദര്‍ശനില്‍ എത്തിയിരുന്ന ശക്തിമാന്‍ പിന്നീട് ആനിമേഷനായാണ് വന്നത്. വര്‍ഷമേറെ കഴിഞ്ഞിട്ടും എല്ലാവരുടെയും മനസ്സില്‍ ശക്തിമാന്‍ മുകേഷ് ഖന്ന തന്നെയാണ്. സിനിമയിലും മുകേഷ് ഖന്ന തന്നെയാണ് ശക്തിമാനായി എത്തുന്നത്.

ശക്തിമാനായി തന്നെയാണ് ജനങ്ങള്‍ തന്നെ ഇപ്പോഴും കാണുന്നത്. പൊതു പരിപാടികളില്‍ പോകുമ്പോള്‍ അത്തരം അനുഭവങ്ങള്‍ ഒരുപാടുണ്ടായിട്ടുണ്ട്. അതെല്ലാം സന്തോഷം നല്‍കുന്നവയാണ് എന്നും ഖന്ന പറയുന്നു. മഹാഭാരതം സീരിയലില്‍ ഖന്ന ചെയ്ത ഭീഷ്മപിതാമഹന്റെ വേഷം ഏറെ ശ്രദ്ധിക്കപ്പെട്ടിരുന്നു. അതിനു ശേഷമാണ് ശക്തിമാനുമായി മുകേഷ് എത്തുന്നത്. ഇതിനിടയില്‍ 150ലധികം ചിത്രങ്ങളിലും 25 പരമ്പരകളിലും വേഷമിട്ടു. മലയാളത്തില്‍ മമ്മൂട്ടിക്കൊപ്പവും അഭിനയിച്ചിട്ടുണ്ട്.