ഇത് ദൈവത്തിന്റെ സ്വന്തം നാട്; മുസ്​ലിം പള്ളിയിൽ നിന്ന് വികാരിയച്ചന്റെ പ്രസംഗം കേട്ട് മനസ് നിറഞ്ഞ് കേരളക്കര

ഒരു ക്രിസ്ത്യൻ പുരോഹിതൻ ജുമാ മസ്ജിദിൽ പ്രസം ഗം നടത്തിയ വാർത്തയാണ് ഇപ്പോൾ ചർച്ചയാകുന്നത്. പള്ളിയിലുണ്ടായിരുന്ന നിയാസ് നാസര്‍ എന്ന വ്യക്തി ഫേസ്ബുക്കിൽ കുറിച്ചതോടെയാണ് ഇൗ അവിസ്മരണീയ അനുഭവം പുറത്തറിഞ്ഞത്. പ്രളയത്തിൽ ആ നാട് ദുരിതമനുഭവിച്ചപ്പോൾ വിളിക്കാതെയും പറയാതെയും സഹായവുമായി എത്തിയ മുസ്​ലിം സഹോദരങ്ങളോടുള്ള നന്ദി അറിയിക്കാനാണ് അച്ചിനകം ക്രിസ്ത്യന്‍ പള്ളിയിലെ വികാരി ഫാ. സനു പുതുശേരി കോട്ടയം വെച്ചൂര്‍ ജുമാ മസ്ജിദിൽ ഇമാമിന്‍റെ പ്രസംഗം നടക്കുമ്പോൾ എത്തിയത്. ഇതോടെ ഇമാം പ്രസംഗം നിർത്തി അദ്ദേഹത്തെ സ്വീകരിച്ചു. ‘പ്രളയം നമ്മളിൽ നിന്ന് പലതും കവർന്നു കൊണ്ട് പോയി എങ്കിലും ആദ്യം നമ്മളിൽ നിന്നും കവർന്നത് പരസ്പരം നാം അതിര് കെട്ടി തിരിച്ച മതിലുകൾ ആയിരുന്നു. നമ്മടെ മനസിലെ അഹങ്കാരങ്ങളെ ആയിരുന്നു. ഞാൻ മാത്രം മതി എന്ന നമ്മടെ കാഴ്ചപ്പാടുകളെ ആയിരുന്നു’വെന്ന് വികാരിയച്ചൻ പറയുകയുണ്ടായി. എന്തായാലും ഒരുമയുടെ ഈ കഥ സോഷ്യൽ മീഡിയയിൽ ചർച്ചയാകുകയാണ്.

Read also: ദളിതനെ തോളിലേറ്റി ക്ഷേത്രത്തിനുള്ളിലെത്തിച്ച് പൂജാരി

ഫേസ്ബുക്ക് പോസ്റ്റിന്റെ പൂർണരൂപം;

ഏറെ വൈകകാരികമായ നിമിഷങ്ങളാണിന്ന് (വെള്ളി 31/8/2018) വെച്ചൂർ ജുമാ മസ്ജിദിൽ അരങ്ങേറിയത്.. സന്തോഷവും അഭിമാനവും അതിലേറെ നാളെയെ പറ്റി ഒത്തിരി പ്രതീക്ഷകളും തന്ന നിമിഷങ്ങൾ…ഇക്കാലമത്രയും അനുഭവിച്ചതിൽ ഏറ്റവും മനോഹരമായ ഒരു വെള്ളിയാഴ്ചയാണിന്ന്.. ഏറെ നേരം നീണ്ടു നിൽകാറുള്ള ജുമാപ്രസംഗം ഇമാം പെട്ടന്ന് അവസാനിപ്പിച്ചത് കണ്ടു കാര്യം എന്താകും എന്ന് ചിന്തിച്ചിരുന്ന ഏവരെയും ഞെട്ടിച്ചു കൊണ്ടാണ് അച്ചിനകം ക്രിസ്ത്യൻ പള്ളിയിലെ വികാരി അച്ഛൻ അങ്ങോട്ട്‌ കയറി വന്നത്..പ്രളയത്തെ തുടർന്ന് ക്രിസ്ത്യൻ ദേവാലയവുമായി ബന്ധപെട്ടു മുസ്​ലിം സഹോദരങ്ങൾ ഒരുപാട് സഹായം ചെയ്തു അതിനു നന്ദി അറിയിക്കുക എന്നതാണ് ആഗമന ലക്ഷ്യം എന്ന് മുഖവുര ഏതുമില്ലാതെ അച്ഛൻ പറഞ്ഞു. ആദ്യമായാണ് ഒരു മുസ്​ലിം പള്ളിയിൽ കയറുന്നത് ,അഭിമാനവും സന്തോഷവും ഉണ്ട് എന്നു പറഞ്ഞാണ് അദ്ദേഹം തുടങ്ങിയത്..ആ വാക്കുകൾ കടമെടുത്താൽ …

” മഹാ പ്രളയതിനാണ് ആണ് നാം സാക്ഷ്യം വഹിച്ചത് ,പ്രളയം നമ്മളിൽ നിന്നും പലതും കവർന്നു കൊണ്ട് പോയി എങ്കിലും ആദ്യം നമ്മളിൽ നിന്നും കവർന്നത് പരസ്പരം നാം അതിര് കെട്ടി തിരിച്ച മതിലുകൾ ആയിരുന്നു, നമ്മടെ മനസ്സിലെ അഹങ്കാരങ്ങളെ ആയിരുന്നു, ഞാൻ മാത്രം മതി എന്ന നമ്മടെ കാഴ്ചപ്പാടുകളെ ആയിരുന്നു, എന്നാൽ പ്രളയം നമ്മെ പഠിപ്പിച്ച ഒന്നായിരുന്നു സഹകരണം, പരസ്പരം ജാതി നോക്കാതെ മതം നോക്കാതെ സമ്പത്തു നോക്കാതെ പരസ്പരം സ്നേഹിക്കാനും സമാധാനിപ്പിക്കാനും നമുക്ക് കഴിഞ്ഞു..

എവിടെ യോ നമുക്കു നഷ്ടമായി കൊണ്ടിരുന്ന മാനുഷിക മൂല്യങ്ങളെ ഉയർത്തി എടുക്കുവാൻ പ്രളയം കൊണ്ട് കഴിഞ്ഞു. പരസ്പരം കണ്ടിട്ടില്ലാത്ത ആളുകൾ പോലും സഹോദരൻ മാരെ പോലെ ഓണവും പെരുന്നാളും ഒക്കെ ഒരേ മനസ്സോടെ ആഘോഷിച്ചു .

ഒരു ദുരന്തം ഉണ്ടാകുമ്പോൾ മാത്രം ഒന്നിക്കേണ്ട ഒന്നല്ല ഈ ബന്ധം ഇതിൽ കൂടെ നാം നേടി എടുത്ത മാനുഷിക മൂല്യങ്ങൾ നമുക്ക് നാളെയുടെ തലമുറക്കും കൈ മാറാം .കാലങ്ങളോളം കൈകോർത്തു മുന്നോട്ട് പോകണം നാം..”

അച്ഛന്റെ വാക്കുകൾ അങ്ങനെ നീണ്ടു പോയി.ആ നിമിഷത്തിലുണ്ടായ വികാരത്തെ വാക്കുകളിൽ വിവരിക്കുക എന്നത് അസാധ്യമാണ്, മനസുകൾ ഒന്നാകുന്ന സുന്ദരമായ കാഴ്ച…

കണ്ണ് നിറഞ്ഞില്ല എങ്കിലും മനസ്സ് സന്തോഷത്താൽ ഒരു പാട് നിറഞ്ഞു. പള്ളിയിൽ കയറാനും സംസാരിക്കാനും കഴിഞ്ഞതിൽ അച്ഛനും സന്തോഷം.

അവിടെ കൂടിയഓരോ വിശ്വാസിയുടെയും മുഖത്തു നിന്നും ഞാൻ വായിച്ചെടുത്തു അവരുടെ മനസിലെ വികാരങ്ങൾ..

ആയിരം ഗോ സ്വാമി മാർ കുരച്ചാലും ആയിരം മോഹൻദാസ് മാർ പിന്നിൽ നിന്നു കുത്തിയാലും കേരളമണ്ണിൽ അതിന് ഇടം നൽകില്ലഎന്ന് ഉറക്കെ പ്രഖ്യാപിക്കുന്നതായിരുന്നു ഇന്ന് നടന്ന സംഭവം. ഒരു പാട് അഭിമാനം തോന്നുന്നു ഒരു മലയാളി ആയതിൽ,ദൈവത്തിന്റെ ഈ സ്വന്തം നാട്ടിൽ ജനിച്ചതിൽ…കൈകോർത്തു മുന്നോട്ട് മുന്നോട്ട് പോകാൻ എന്നും നമുക്ക് കഴിയട്ടെ എന്ന പ്രാർത്ഥന യോടെ

നിയാസ്….