ഇടുക്കി : ബന്ധുക്കൾ എത്താത്തതിനെത്തുടർന്ന് വയോധികന്റെ മൃതദേഹം സര്‍ക്കാര്‍ ആശുപത്രിയിലിരുന്ന് അഴുകി. നെടുങ്കണ്ടം ടൗണിലെ വ്യാപാര സ്ഥാപനത്തിനു സമീപം മരിച്ച നിലയില്‍ ചൊവ്വാഴ്ച കണ്ടെത്തിയ 70 വയസ്സ് തോന്നിക്കുന്ന വയോധികന്റെ മൃതദേഹമാണ് ഉടുമ്പൻചോല താലൂക്ക് ആശുപത്രി മോര്‍ച്ചറിയിലിരുന്ന് അഴുകിയത്.
ഇയാളുടെ ബന്ധുക്കളെക്കുറിച്ച്‌ വിവരം ലഭിക്കാത്തതിനാല്‍ ഇന്‍ക്വസ്റ്റ് തയാറാക്കി മൃതദേഹം താലൂക്ക് ആശുപത്രി മോര്‍ച്ചറിയിലേക്ക് മാറ്റുകയായിരുന്നു. മരിച്ച് ദിവസങ്ങൾ കഴിഞ്ഞിട്ടും ബന്ധുക്കൾ എത്താത്തതിനെത്തുടർന്ന് മൃതദേഹം മറവു ചെയ്യുന്നതിന് പോസ്റ്റ്മോര്‍ട്ടം നടപടി ആരംഭിച്ചതോടെയാണ് ഫ്രീസര്‍ പ്രവര്‍ത്തിക്കാത്തതിനാല്‍ മൃതദേഹം അഴുകിയ നിലയിൽ കണ്ടെത്തിയത്.
Read also:ഇതരസംസ്ഥാന തൊഴിലാളി ദുരൂഹ സാഹചര്യത്തില്‍ മരിച്ച നിലയില്‍
ഫ്രീസര്‍ തുറന്നതോടെ ആശുപത്രിയിലും പരിസരത്തും രൂക്ഷഗന്ധം വമിച്ചു. ആശുപത്രിയില്‍ വൈദ്യുതി മുടക്കം പതിവായിരുന്നുവെന്നും യഥാസമയം ജനറേറ്റര്‍ പ്രവര്‍ത്തിപ്പിക്കാഞ്ഞതാണ് മൃതദേഹം അഴുകാന്‍ കാരണമെന്നുമാണ് കിടപ്പുരോഗികളും മറ്റും പറയുന്നത്.
ചൊവ്വാഴ്ചയാണ് മൃതദേഹം ഇന്‍ക്വസ്റ്റ് തയാറാക്കി ഫ്രീസറില്‍ സൂക്ഷിച്ചത്. അന്ന് ഫ്രീസറിന് ഒരു തകരാറും ഇല്ലായിരുന്നെന്നും തകരാര്‍ ശ്രദ്ധയില്‍പെട്ടിരുന്നെങ്കില്‍ മൃതദേഹം മറ്റ് ആശുപത്രിയിലേക്ക് മാറ്റുമായിരുന്നെന്നും ആശുപത്രി സൂപ്രണ്ട് ഡോ. മെറിന്‍ പറഞ്ഞു. ഫ്രീസറിന്റെ മോനിറ്റര്‍ പ്രവര്‍ത്തിക്കുന്നില്ലെന്ന് സെക്യൂരിറ്റി അറിയിച്ചതനുസരിച്ച്‌ പോസ്റ്റ്മോര്‍ട്ടത്തിന് നടപടിയെടുക്കുകയോ വേറെ ആശുപത്രിയിലേക്ക് മാറ്റുകയോ ചെയ്യണമെന്ന് പോലീസ് സ്റ്റേഷനില്‍ രേഖാമൂലം അറിയിച്ചിരുന്നു. എന്നാല്‍, വെള്ളിയാഴ്ചയാണ് പൊലീസ് എത്തിയതെന്ന് സൂപ്രണ്ട് പറഞ്ഞു.
പോലീസിന്റെ ഭാഗത്തുനിന്ന് നടപടിക്രമങ്ങള്‍ പൂര്‍ത്തിയാക്കിയാണ് മൃതദേഹം ആശുപത്രിയില്‍ എത്തിച്ചതെന്നും ബന്ധുക്കള്‍ എത്തിയില്ലെങ്കില്‍ പോസ്റ്റ്മോര്‍ട്ടം അടക്കം നടപടിയെടുത്ത് മൃതദേഹം മറവ് ചെയ്യേണ്ട ജോലി പഞ്ചായത്തിനാണെന്നും നെടുങ്കണ്ടം സി.ഐ അയ്യൂബ്ഖാന്‍ പറഞ്ഞു.
Post Your Comments